PONTEVEDRA

O Partido Socialista, contra a suba do canon do lixo anunciada por Sogama. O grupo municipal de Pontevedra levará ao pleno de setembro unha moción para instar á Xunta que reverta o incremento das taxas. Segundo o anunciado, o canon pasará dos 66 euros por tonelada que se paga na actualidade aos 108 euros no 2025. Unha medida que, aseguran os socialistas, suporá un gran impacto nas arcas municipais e no recibo que pagan os veciños.

A activación da prealerta pola seca no río Lérez é unha medida tomada por prudencia. Así o explicou hoxe o presidente da Xunta de Galicia. Segundo Alfonso Rueda, os técnicos tomaron a decisión pensando no que podería suceder se setembro e outubro foran meses secos. Dende o concello, pola súa banda, afirman que o abastecemento está asegurado. Actualmente o encoro do Pontillón atópase ao 95% da súa capacidade e o caudal do Lérez é semellante ao que levaba o río o ano pasado nestas datas.

A Xunta de Galicia humanizará a estrada PO-308 á altura da Barca, no concello de Poio. Trátase dunha actuación moi agardada e demandada pola cidadanía. A intención da Xunta é, segundo asegurou o presidente Alfonso Rueda, comezar os traballos o vindeiro ano.

O proxecto básico de rehabilitación de Santa Clara xa ten o visto bo de Patrimonio. A proposta do estudo de arquitectura Nieto Sobejano recibiu luz verde do departamento da Xunta, incorporando as modificacións solicitadas polo goberno do Partido Popular na Deputación de Pontevedra. Este avance supón un importante paso que se suma a outro dado polo executivo provincial, que xa solicitou ao concello a licenza de obra a finais do mes de xullo.

Portos de Galicia agarda o visto bo do Ministerio para a Transición Ecolóxica para desbloquear a dragaxe do río Lérez. O ente autonómico enviou ao Goberno central as súas propostas sobre posibles localizacións para a vertedura dos áridos que resultarían da operación. A do Lérez non é a única pero si a máis ambiciosa das dragaxes que están pendentes en Galicia.

Duro golpe o que sufriu a finais da semana pasada a cooperativa vitivinícola Viña Moraima, do concello de Barro. Na mañá do venres os socios atoparon cortadas máis de 900 cepas dun viñedo próximo ás súas instalacións. Algunhas delas, centenarias. Non saben quen está detrás destes feitos, que xa foron denunciados ante a Garda Civil. Cifran as perdas causadas en máis de 100.000 euros.

As Forzas Armadas volverán colaborar na vixilancia dos montes galegos durante o verán. O vindeiro 15 de agosto comeza a Operación Centinela Galego, que suporá o despregamento de 30 patrullas e medio aéreos militares para contribuír á prevención dos lumes forestais. Aínda que o tempo podería ampliarse de ser necesario, nun principio estarán nos montes ata o 30 de setembro.

ENCE abre a convocatoria dunha nova edición do seu Plan Social. Os proxectos poderán presentarse entre o 2 de setembro e o 1 de outubro, e deberán desenvolverse no ámbito territorial de Pontevedra, Marín e Poio. Para estas achegas, a empresa destina un total de 3 millóns de euros por edición.

A Deputación de Pontevedra estrea nova folla de ruta para a súa aposta polo turismo. Chámase Estratexia Rías Baixas Turismo 61 e busca desenvolver un sector sustentable e respectuoso en todos os concellos da provincia. Hoxe presentouse no Palacete das Mendoza.

En canto ás investigacións para determinar as causas do naufraxio, o delegado do Goberno en Galicia explicou que están en mans das autoridades británicas. Nas súas declaracións iniciais, os sobreviventes atribúen o afundimento a unha vía masiva de auga producida pola rotura dunha comporta no costado do palangreiro. Hoxe Pedro Blanco asegurou que España non se debe inmiscir nas pescudas.