PONTEVEDRA

O presidente do Partido Popular de Pontevedra confirma que será o candidato do PP nas eleccións municipais do 2027. Rafa Domínguez fíxoo presentando as liñas mestras do seu programa electoral, e defendendo a necesidades de impulsar unha nova etapa política na cidade. Entre as súas propostas, destacou a apertura da cidade cara á ría, a creación dunha cidade deportiva ou a construción dunha biblioteca municipal.

O mellor da natación artística a nivel mundial xa adestra en Pontevedra. A piscina olímpica de Ponte Muíños acollerá esta fin de semana a Copa do Mundo deste deporte, reunindo a 29 países e 450 participantes. Hoxe o alcalde da cidade, Miguel Anxo Fernández Lores, e o presidente da Real Federación Española de Natación, Fernando Carpena, visitaron as instalacións de Rías do Sur.

Pontevedra inicia o cambio a LED de 2.300 luminarias da zona norte, co que aforrará un 77% na factura da luz

Nova xornada do ciclo “Pontevedra, quen pasa? Seis expertos en saúde, seis meses”. Desta volta, a iniciativa organizada polo servizo de Aparello Dixestivo da área sanitaria de Pontevedra e O Salnés a través do grupo de investigación Idara trouxo ata a cidade a Pilar Nos, xefa do servizo de Medicina Dixestiva do Hospital La Fe de Valencia e unha das maiores expertas españolas en enfermidade de Crohn e colite ulcerosa. Nos defendeu a importancia do diagnóstico precoz.

Poio viaxou esta fin de semana ao pasado coa Festa de Colón. O municipio reivindicou a teoría da orixe galega do navegante con moito ambiente e animación polas rúas de Combarro. Unha cita que serve ademais para dinamizar social e economicamente o concello, nunha cita que ano tras ano incrementa a participación de veciñanza e visitantes.

A Finca Areeiro, en Pontevedra, estrea anfiteatro. A Deputación de Pontevedra inaugurou hoxe este espazo, pensado para achegar ao público a realidade do sector primario e o labor de innovación que realiza a Estación Fitopatolóxica. Esta estrea fíxose coincidir coa posta en valor da marca Té Areeiro, producida nesta estación, co gallo do Día Internacional do Té.

Pontevedra é a cidade escollida para validar no espazo público o proxecto europeo AMBIANCE. Na Praza de Barcelos están instaladas varias pezas de mobiliario urbano de gran tamaño, elaboradas con biomateriais e fabricadas mediante impresión 3D. Durante seis meses, a instalación permitirá avaliar a resistencia destes novos materiais. O proxecto foi desenvolvido pola empresa local Setga, o Centro Tecnolóxico AIMEN e un consorcio formado por dez entidades de ata seis países europeos.

Espazo Depo é o novo plan de cooperación cos concellos posto en marcha pola Deputación de Pontevedra. Trátase dunha inxección extraordinaria de 20 millóns de euros para que 18 municipios pontevedreses executen proxectos considerados estratéxicos. Esta liña de axudas cubrirá o 20% da achega que os concellos teñen que aportar no financiamento de proxectos municipais que acadaron fondos europeos Feder ou Edil.

O pleno do concello de Pontevedra aproba esixir compensacións xustas e diálogo cos afectados polo PIA de San Amaro. Os votos a favor de PSOE e Partido Popular sacaron adiante unha moción dos socialistas. Defenden que este é o momento de dialogar cos veciños e que non suporía retrasar o proxecto. O BNG optou pola abstención porque consideran que con isto se paraliza a construción de vivenda pública en Pontevedra.

Medio cento de veciños afectados por este PIA de San Amaro asistiron hoxe ao pleno de Pontevedra. Antes da sesión criticaron a xestión realizada do proxecto. Denuncian a falta de comunicación previa e preocúpalles especialmente a pinza de prezos que se fixa no Diario Oficial de Galicia, con compensacións de entre 2 e 10 euros por metro cadrado. A conselleira de Vivenda, María Martínez, reunirase con eles este venres 22 de maio.