Pontevedra

A Deputación de Pontevedra colaborará cos concellos para arranxar as estradas de titularidade municipal danadas polos temporais deste inverno. Esta mañá o presidente Luis López presentou un novo plan provincial. Chámase Plan Vía Depo, está dotado con 8 millóns de euros e diríxese aos concellos de menos de 50.000 habitantes. O obxectivo é axudar ás administracións locais a reparar fochancas, actuar en sistemas de drenaxe ou adecentar accesos a recursos naturais.

A Deputación de Pontevedra busca a certificación Starlight para os castelos de Soutomaior e Sobroso. Un distintivo que recoñece a calidade do ceo nocturno e a súa protección e co que a administración provincial busca consolidar unha oferta turística vinculada ao astroturismo. A primeira oportunidade para afianzarse neste eido será o vindeiro 12 de agosto, coas Rías Baixas como un dos mellores lugares do mundo para observar o eclipse solar total que se vai producir. Para artellar toda a proposta, a Deputación creou o produto ‘Baixo o ceo das Rías Baixas’, ao que quere tamén incorporar ao sector turístico.

Unha tri empanada para conmemorar a Gran Final das Series Mundiais de Tríatlon que Pontevedra acollerá este ano. É o produto no que está a traballar unha das empresas colaboradoras na organización da cita, Panaderías Acuña. Será unha edición limitada, que só estará dispoñible durante a semana de probas deportivas. Hoxe o alcalde pontevedrés, Miguel Anxo Fernández Lores, visitou o obradoiro da panadería no polígono de Barro.

Pontevedra dá luz verde ás obras de emerxencia no Teatro Principal. A xunta de goberno local aprobou hoxe os expedientes para realizar estes traballos trala caída do falso teito do inmoble. O orzamento ascende a 252 mil euros, mentres que o prazo estimado de execución é de seis meses. De cumprirse o previsto, o Teatro podería reabrir as súas portas no mes de outubro.

Hoxe en Pontevedra conmemorouse o Día Internacional do Pobo Xitano que se celebra cada 8 de abril. Xunto coa Fundación Secretariado Xitano, o concello despregou a bandeira xitana no balcón da Casa da Luz. Tamén se deu lectura a un manifesto, no que os participantes esixiron igualdade de oportunidades e visibilizar o antixitanismo que, aseguran, aínda persiste en diversos eidos da sociedade.

As traballadoras do comercio téxtil e de calzado está chamado a mobilizarse en Pontevedra. O sindicato CIG vén de convocar concentracións para este venres e unha folga o da vindeira semana para protestar contra o convenio que se está a negociar en Madrid para todo o Estado. Aseguran que o paso do convenio provincial actual ao estatal suporía unha perda de preto de 2.000 euros ao ano para as dependentas e o retroceso en dereitos relacionados coa conciliación e a saúde laboral.

A área sanitaria de Pontevedra e O Salnés presenta un programa integral para coidadores informais de persoas con demencia. Desenvolvido en colaboración con AFAPO e a Universidade de Vigo, son 24 sesións presenciais cun enfoque integral e multidisciplinar. O obxectivo: dotar a estas persoas coidadoras de coñecementos e habilidades necesarias para afrontar a atención destes doentes dun xeito eficaz, humanizado e sostible no tempo.

Fomentar a mobilidade e a autonomía infantil na cidade. É o obxectivo de ‘Eu son, nós imos’, a nova compaña posta en marcha dende o concello de Pontevedra. O proxecto comezará mañá mesmo, traballando este curso co alumnado de cuarto de primaria dos colexios Vidal Portela, Froebel e Álvarez Limeses. Ademais de intervencións nas aulas, a programación contempla actividades fóra dos centros e mesmo coas familias.

A Xunta de Galicia incide no seu apoio á continuidade do comercio local con programas como o bono remuda. Trátase dunha iniciativa dirixida a buscar o relevo xeracional neste tipo de establecementos. Hoxe o conselleiro de Emprego visitou a Ferretería Gallega, en Pontevedra, destacando tamén o seu modelo de atención personalizada.

O Gastroespazo do Mercado de Abastos de Pontevedra busca novos inquilinos. O concello anunciou hoxe a saída a concurso de dez dos postos para reactivar a súa oferta. En concreto, son nove postos comerciais e un dos bares do primeiro andar deste equipamento pontevedrés. Ademais, o goberno local reservará a maiores dúas das casetas baleiras para poñelas a disposición de iniciativas da hostalería local.