Pontevedra

Hoxe conmemórase o Día para a Erradicación da Pobreza e a asociación Boa Vida saíu á rúa en Pontevedra para poñer o foco sobre os malos tratos sociais e institucionais que padecen as persoas en risco de exclusión. Cunha mesa informativa na Praza da Peregrina, interpelaron á veciñanza para recoller as súas opinións e reflexións. Dende o advirten de que a pobreza non é só a escaseza de recursos, tamén non poder acceder a eles. E sinalan a dificultade de acceso á vivenda como un dos principais problemas en Pontevedra.

A Asociación Española contra o Cancro presentou hoxe en Pontevedra a súa nova campaña de concienciación sobre o cancro de mama. Baixo o lema ‘Nos lo tomamos a pecho’, a iniciativa pon o foco no que significa vivir con esta enfermidade máis aló do diagnóstico e do tratamento. E quen mellor para poñer voz a esta realidade que mulleres que a padecen. Elas cocrearon e protagonizan esta nova campaña.

As farmacias pontevedresas súmanse á loita activa contra a violencia machista. Hoxe comezou a posta en marcha do programa de intervención do farmacéutico en materia de violencia de xénero, unha iniciativa que supón a implantación do punto violeta entre as máis de 400 oficinas de farmacia que se queiran sumar. Unha medida que pode ser clave en moitos casos, sobre todo no rural.

O Arquivo Histórico Provincial de Pontevedra sumou hoxe un novo documento moi especial aos seus fondos. Trátase da declaración de herdeiros de Alfonso Daniel Rodríguez Castelao. O expediente foi localizado de casualidade en agosto no Xulgado de Primeira Instancia número 1 de Pontevedra. Agora entrégase ao arquivo provincial, destacando o seu interese histórico, social e cultural. Un achado que se produce ademais neste Ano Castelao, cando se conmemoran os 75 anos do seu pasamento.

O concello de Pontevedra estrea marca institucional. Chámase ‘Responsábeis’ e pon o foco no compromiso e os pequenos esforzos de toda a veciñanza para construír a Pontevedra do futuro. A campaña supón un decálogo de obxectivos que van dende o coidado do planeta ata o amor pola cidade e a equidade social. Conciencia, compromiso e solidariedade son os sinais de identidade desta nova marca.

Mobilización dos traballadores de ENCE para denunciar novos recortes de persoal na fábrica de Lourizán. Desta volta, despois de coñecer a decisión da empresa de suprimir o servizo médico da factoría que atende ao cadro de persoal. A pasteira aposta pola súa externalización, coa contratación de QuirónSalud. O comité asegura que, ademais de supoñer a eliminación de postos de traballo, implica un empeoramento na seguridade do resto de operarios da fábrica. Dende ENCE defenden que a decisión mellora esta atención.

As obras de rehabilitación do antigo conservatorio e do edificio de Churruchaos, en Pontevedra, estarán rematadas a tempo para cumprir os prazos establecidos polos fondos PIREP. Os traballos están a ser cofinanciados por estas axudas europeas, xestionadas polo Ministerio de Vivenda e Axenda Urbana, que fixan o mes de marzo de 2026 como data límite para rematar as obras. Os dous proxectos suman unha achega de 3 millóns de euros. Hoxe recibiron a visita do delegado do goberno en Galicia, Pedro Blanco.

A necesidade de crear máis chan industrial en Pontevedra irá ao vindeiro pleno municipal da man do PSOE. A formación presentará unha moción para instar ao goberno local a que atenda o ofrecemento de Zona Franca e así estudar co ente estatal a creación de novas áreas industriais na cidade. Todo, din os socialistas, ante a inacción da Xunta de Galicia. Entre as posibles zonas, o PSOE aposta por analizar a creación dun porto seco en Leborei, na parroquia de Cerponzóns.

Viable pero insuficiente. É o resumo do estudo técnico que realizou o concello de Pontevedra sobre a posibilidade de instalar unha tubaxe na rúa José Malvar para evitar os asolagamentos en Padre Fernando Olmedo. Os expertos apuntan que a medida contribuiría a reducir o caudal do rego Valdecorvos, pero precisaría doutras actuacións para ser unha solución real ao problema das inundacións. Non substituiría cuestións que xa están sobre a mesa, como a construción das balsas inundables no barrio de Valdecorvos.

O comercio electrónico analizarase os días 9 e 10 de outubro en Pontevedra. O Pazo da Cultura acolle a cuarta edición dos Ecommerce Days, unha cita dedicada a este modelo de negocio de compra e venda a través de internet. Este ano a proposta suma un día máis á súa programación e a día de hoxe supera xa os 250 inscritos. Está dirixido a profesionais do sector do comercio.