Pontevedra

A Ruta do Viño Rías Baixas prepara unha nova edición da súa Cata de Vendima. Trátase dunha proposta na que se explica todo o proceso do viño, dende a recollida da uva ata a súa elaboración. Os asistentes poderán aprender de forma práctica e visual os distintos factores que afectan ao crecemento da uva, así como as distintas variedades da Denominación de Orixe Rías Baixas. A cata vai ter lugar o vindeiro 19 de outubro no Pazo de Mugartegui en Pontevedra. As entradas xa están á venda.

A etapa de hoxe da Vuelta acabou sendo cortada en Mos oito quilómetros antes da meta por mos das protestas. En Poio milleiros de persoas concentráronse na ponte da Barca, mentres que en Pontevedra a mobilización tivo lugar na zona da rúa Manuel del Palacio. Os manifestantes protestaron contra a participación de Israel, acusando á organización da Vuelta de branquear o xenodicio en Gaza. Ducias de axentes da Garda Civil blindaron o paso do pelotón por estas zonas para garantir a celebración da proba.

CIG Ensino comeza o curso como o rematou: con mobilizacións. O sindicato ten previstas dúas xornadas de protesta para este mes de setembro. Dunha banda, unha manifestación en Santiago para o sábado 13. Da outra, unha xornada de folga para o día 25. Con estas iniciativas, buscan denunciar os recortes na educación pública da Xunta de Galicia e a falta de docentes.

Pontevedra comeza a substituír os colectores de lixo de todo o municipio. O cambio comezará cos de cor azul, os destinados á recollida de papel e cartón. Son case 500 os que se repartirán polo concello, comezando esta mesma semana pola rúa San Mauro. En total, está prevista a instalación de 4.000 colectores novos.

Milleiros de persoas mobilizáronse onte en Galicia para protestar contra a vaga de lumes que está a arrasar principalmente a provincia de Ourense. Houbo concentracións en diferentes localidades do territorio. Entre elas, Vilagarcía e Pontevedra. Os centos de participantes criticaron tamén a política forestal da Xunta de Galicia ao berro de ‘Lumes forestais nunca máis’.

O Mundial Multisport deixou unha pegada económica de máis de 21 millóns de euros na cidade de Pontevedra. Son datos aportados polo comité organizador do evento, que no mes de xuño achegou ata a capital a máis de 3.000 deportistas e máis de 7.000 visitantes. Deste xeito, o concello pecha este capítulo e mira xa cara o vindeiro: a Gran Final das Series Mundiais do ano que vén.

Na súa terceira xornada de folga os traballadores de Aludec levaron as súas protestas ao centro de Pontevedra. O cadro de persoal percorreu o centro da cidade para chamar a atención sobre as súas reclamacións. Piden salarios xustos e condicións laborais dignas nos centros de traballo da empresa. Mañá están convocados a unha nova reunión coa dirección para intentar avanzar nas negociacións.

A Princesa Leonor deu hoxe por finalizada a súa etapa en Marín. Once meses despois do seu ingreso na Escola Naval da vila, esta mañá a Princesa de Asturias recibiu a Gran Cruz ao Mérito Naval con distintivo branco. Fíxoo no marco do acto da xura de bandeira dos aspirantes do primeiro curso e de entrega dos Reais Despachos a 130 novos oficiais da Armada, que contou coa presenza do rei Felipe VI, da raíña Letizia e da infanta Sofía . Esta xornada marcou o remate da etapa formativa de Leonor de Borbón na Armada.

Dende hoxe, a receita electrónica concertada xa funciona tamén para os mutualistas de MUFACE. Son 17.000 as persoas na provincia de Pontevedra que xa poden solicitar a súa nova tarxeta. O sistema será semellante ao que xa se aplica no Servizo Galego de Saúde.

A delegación pontevedresa rematou hoxe o seu periplo por Tenerife para presentar os Premios Feroz 2026. Antes de regresar, esta mañá mantivo unha reunión coa Asociación de Informadores Cinematográficos de España. No seu marco, acordaron que a programación previa á gala do 24 de xaneiro será máis ampla, comezando xa no mes de setembro. Tamén que a primeira actividade será un diálogo co segundo presentador ou presentadora que acompañará á artista Samantha Hudson na gala.