Pontevedra

Hoxe, 11 de xullo foi festivo local en Pontevedra. Día de San Bieito e, por suposto, de romaría. Centos de persoas acudiron fieis á súa cita co santo máis milagreiro, cumprindo coas misas e con todos os ritos para conseguir os seus favores ao longo do ano. Unha xornada que se completou coa proposta máis festiva na beira do Lérez, con música, xantar popular e mexilloada.

Xa están en marcha os traballos de demolición das partes máis afectadas polo lume do edificio que ardeu este martes na rúa Riestra de Pontevedra. O dispositivo comezou a primeira hora da mañá e foi, cando menos, chamativo: un guindastre de grandes dimensións tivo que suspender no aire un colector de obra para recoller os cascallos. A rúa permanece pechada neste punto e os traballos prolongaranse, cando menos, ata mañá.

O 24 de xaneiro de 2026 será a nova cita de Pontevedra co máis destacado do audiovisual español. A cidade volverá vestir de gala para acoller a súa segunda gala dos Premios Feroz. O evento foi presentado hoxe en Tenerife e, ademais de facer pública a data, tamén se desvelou quen será a súa primeira presentadora: a artista Samantha Hudson.

Un edificio do centro de Pontevedra quedou arrasado por un incendio que se declarou esta madrugada. Foi no número 4 da rúa Riestra e as tarefas de extinción foron ben complicadas. Aínda que o lume se deu por extinguido durante a noite, as lapas reaviváronse varias veces durante o día. Aínda que non se rexistraron danos persoais, os materiais son abondosos. Ademais dos 20 veciños do inmoble afectado foron desaloxados ata mañá os habitantes dos edificios lindeiros para garantir a súa seguridade.

Satisfacción no sindicato CIG polo seguimento acadado na primeira xornada de folga na empresa Aludec. A plataforma sindical asegura que preto dunhas 300 persoas participaron nos piquetes e nas concentracións diante dos distintos centros de traballo da compañía de automoción. Este xoves está convocada unha nova reunión da mesa de negociación para acadar melloras nas condicións laborais dos traballadores.

A Deputación de Pontevedra investirá preto de 80 millóns de euros ata final de mandato na capital de provincia. É a estimación que hoxe presentou o seu vicepresidente, Rafa Domínguez. Segundo Domínguez, a administración provincial ten por diante proxectos ambiciosos para a cidade, como a rehabilitación de Santa Clara e dos edificios centrais do Museo, a nova Bienal de Arte ou os futuros convenios anuais co concello de Pontevedra. Actuacións que se suman ás xa realizadas nos dous primeiros anos de mandato que, segundo o vicepresidente provincial, supuxeron un investimento de 28 millóns de euros.

Máis de 300 actividades encherán o verán pontevedrés de diferentes propostas para todos os públicos. O concello presentou hoxe a súa programación para esta época estival, que abrangue dende a Festa dos Libros esta mesma fin de semana ata a Feira Franca, que se celebrará os días 5 e 6 de setembro. Entre medias, concertos, cinema, monicreques, baile e, por suposto,as Festas da Peregrina, farán que o verán non teña parada en Pontevedra.

Aínda coa resaca da xornada de clausura, Pontevedra fixo balance esta mañá do Multisport de Tríatlon. Durante dez días a cidade converteuse na capital mundial deste deporte, atraendo a máis de 3.500 deportistas. Dende a organización explican que cita foi todo un éxito e, unha vez máis, consolida a imaxe de Pontevedra como a cidade perfecta para acoller grandes eventos internacionais.

Tres persoas detidas e varios rexistros en Vilanova de Arousa é o balance que deixa o último operativo contra o tráfico de drogas desenvolvido na comarca do Salnés. No marco da operación, bautizada como Ninja 2, axentes da Udyco do Corpo Nacional de Policía desmantelaron unha organización que traficaba principalmente con marihuana, aínda que tamén se localizaron pequenas cantidades de haxix e cocaína. A operación continúa aberta. Este novo golpe contra o narcotráfico pode ter un especial simbolismo. Hoxe conmemórase o Día Internacional contra o Tráfico Ilícito e abuso de Drogas, xornada que tivo o seu acto central en Galicia na cidade de Pontevedra. Aquí a Fundación Galega contra o Narcotráfico en colaboración coa Deputación pontevedresa, leu un manifesto para alertar do incremento da presenza das drogas na sociedade e concienciar da importancia da loita contra o tráfico de estupefacientes.

Máis de 3.300 sinaturas demostran o apoio ás reclamacións das familias do colexio do Piñeiriño, en Vilagarcía. Demandan á Xunta de Galicia o desdobre dunha aula de infantil, a de cuarto. Explican que hai 19 alumnos, tres con necesidades especiais. Eles computarían o dobre polo que se superaría a ratio establecida de 20 pequenos por aula. Hoxe presentaron as sinaturas na delegación da Xunta en Pontevedra.