Pontevedra

As traballadoras da empresa Servicio, Personas y Salud, encargada do servizo de cociña do Hospital Quirónsalud Miguel Domínguez de Pontevedra irán á folga. Serán catro xornadas de paro para protestar polas súas condicións laborais. Non só iso. Denuncian que a empresa está a ofrecer un servizo deficiente aos pacientes, con comida conxelada e menús que en moitas ocasións non atenden ás dietas pautadas.

O Tribunal Constitucional acepta a trámite o recurso de amparo do concello de Pontevedra contra a prórroga concedida a ENCE ata o ano 2073. O goberno local recibiu hoxe mesmo a provindencia do alto tribunal, que se pronuncia case dous anos despois da presentación do recurso. Para o executivo pontevedrés, esta decisión do Tribunal Constitucional confirma a postura do concello: o procedemento contra ENCE segue aberto.

Os criterios ambientais, económicos e sociais están a marcar a organización do Mundial Multisport de tríatlon que Pontevedra acollerá no mes de xuño. Dende o concello fan fincapé na aposta pola sostenibilidade, con iniciativas como a instalación de fontes ou a redución dos plásticos. Os organizadores comprométense tamén coa saúde. Así, da man da Asociación Española contra o Cancro repartirase información sobre o coidado da pel e contra o tabaquismo.

Sesenta artistas de 28 nacionalidades exporán durante este verán en Pontevedra. Farano no marco da Bienal, que volve á cidade do 21 de xuño ao 30 de setembro despois de quince anos de parón. Co lema ‘Volver a ser humanos. A dor dos demais’, contará con figuras como Olafur Eliasson, Hans Haacke ou Emily Jacir. A través das súas obras, reflexionarán sobre os conflitos que marcan a actualidade.

Novo proxecto de innovación posto en marcha polo Centro Integrado de Formación Profesional Carlos Oroza de Pontevedra. Desta volta, a proposta pasa pola posta en marcha un Laboratorio de Servizos 5.0; unha iniciativa que ten como obxectivo transformar a formación nos servizos de restauración a través de metodoloxías activas e tecnoloxías avanzadas. Hoxe o centro celebrou unha xornada de portas abertas para dar a coñecer este proxecto.

En Pontevedra, hoxe adxudicouse a redacción do proxecto de integración urbana da ponte de Santiago e da contorna da rúa Serra. Dende o concello explican que a actuación mudará o aspecto da parcela existente entre a propia rúa e a avenida de Bos Aires. Trátase dunha zona verde que ata o ano pasado pertencía ao Instituto Galego de Vivenda e Solo e sobre a que os veciños levan anos reclamando que se actúe.

O BNG pide ao presidente da Deputación de Pontevedra que substitúa a Rafa Domínguez como encargado das obras do Museo pontevedrés. Segundo César Mosquera, dous anos despois do cambio no goberno provincial, Domínguez ten demostrado a súa incapacidade para avanzar nos proxectos dos edificios centrais e de Santa Clara. Asegurou o nacionalista que actualmente están peor que no 2023.

O concello de Pontevedra mantén as súas previsións: o parque da Parda estará rematado no ano 2027. Hoxe o alcalde visitou os traballos que, asegurou, avanzan en tempo e forma. De feito, Miguel Anxo Fernández Lores confía en que se poidan acurtar os prazos e que as obras da que será a maior zona verde da cidade estean rematadas antes da data límite. A intervención conta cun orzamento de 5,3 millóns de euros.

A delincuencia baixou na cidade de Pontevedra no que levamos de 2025 respecto do mesmo período do ano pasado. Así o asegurou hoxe o subdelegado do goberno despois da celebración da xunta local de seguridade. Segundo Abel Losada, o índice de delincuencia se reduciu en algo máis dun 6%. Asegurou que Pontevedra é unha cidade segura e acusou ao Partido Popular de empregar argumentos que fomentan o odio ás persoas que viven na rúa.

A Xunta de Galicia e o concello de Pontevedra oficializaron esta tarde a cesión de novas parcelas para a construción de vivenda pública. Alfonso Rueda e Miguel Anxo Fernández Lores asinaron a acta pola que o goberno local transfire a titularidade ao Instituto Galego de Vivenda e Solo dos terreos na Parda, Tafisa e Valdecorvos. Segundo os cálculos iniciais, estas parcelas poderán acoller 118 novas vivendas de promoción pública na cidade.