Pontevedra

O concello de Pontevedra mantén as súas previsións: o parque da Parda estará rematado no ano 2027. Hoxe o alcalde visitou os traballos que, asegurou, avanzan en tempo e forma. De feito, Miguel Anxo Fernández Lores confía en que se poidan acurtar os prazos e que as obras da que será a maior zona verde da cidade estean rematadas antes da data límite. A intervención conta cun orzamento de 5,3 millóns de euros.

A delincuencia baixou na cidade de Pontevedra no que levamos de 2025 respecto do mesmo período do ano pasado. Así o asegurou hoxe o subdelegado do goberno despois da celebración da xunta local de seguridade. Segundo Abel Losada, o índice de delincuencia se reduciu en algo máis dun 6%. Asegurou que Pontevedra é unha cidade segura e acusou ao Partido Popular de empregar argumentos que fomentan o odio ás persoas que viven na rúa.

A Xunta de Galicia e o concello de Pontevedra oficializaron esta tarde a cesión de novas parcelas para a construción de vivenda pública. Alfonso Rueda e Miguel Anxo Fernández Lores asinaron a acta pola que o goberno local transfire a titularidade ao Instituto Galego de Vivenda e Solo dos terreos na Parda, Tafisa e Valdecorvos. Segundo os cálculos iniciais, estas parcelas poderán acoller 118 novas vivendas de promoción pública na cidade.

O Centro Integrado de Formación Profesional Carlos Oroza presentou esta semana o resultado dun novo proxecto de innovación. Trátase dunha máquina de vending que achega ao cliente unha oferta ben diferente á que estamos afeitos. Os típicos doces ou snacks quedan substituídos por pratos completos elaborados con produtos quilómetro cero. Unha proposta pioneira en España que pode ter o seu oco en hoteis, empresas ou hospitais.

Miguel Anxo Fernández Lores, non dubida. Está disposto a volver presentarse como candidato á alcaldía de Pontevedra polo BNG no 2027. Cando o mandato acada o seu ecuador, o rexedor asegura que se atopa no seu mellor momento. Tamén está convencido de que o actual será o seu mandato máis frutífero á fronte da capital pontevedresa.

O Partido Socialista reclama á Xunta que estenda a dragaxe do Lérez ata a Ponte dos Tirantes. É unha das emendas que o PSOE presenta á moción que levará o Partido Popular ao vindeiro pleno de Pontevedra sobre esta actuación no río. Pretenden transformar o texto dos populares, que consideran partidista e propagandístico.

As demandas das Policías Nacional e Local volverán estar presentes no vindeiro pleno de Pontevedra. Será a través dunha moción do Partido Popular. Desta volta, a formación céntrase en dar pulo a dúas vellas reclamacións dos dous corpos: a renovación das comisarías, para contar con instalacións dignas e modernas.

Axudar ás mulleres con cancro a recuperar a súa autoestima. É un dos obxectivos polo que hai xa once anos traballa Jossy Peralta. Dende o seu negocio en Pontevedra, Extensiones Jossy, elabora e coloca extensións de cabelo natural ás clientas que perderon o seu pelo polo impacto dos tratamentos de quimioterapia. Un labor que fai, ademais, de xeito gratuíto. Ata ela xa se achegaron mulleres de toda Galicia e mesmo doutros puntos de España.

Sete dos oito detidos esta semana no marco da última operación contra o tráfico de drogas realizada no Salnés pasaron hoxe a disposición xudicial. Tras prestar declaración ante o xulgado de instrución número 2 de Vilagarcía que dirixe a investigación todos quedaron en liberdade. Tres deles, iso si, terán que comparecer no xulgado de xeito mensual. Segundo fontes oficiais, ninguén solicitou outro tipo de medidas para os detidos. A causa séguese por tráfico de drogas e por pertenza a organización xudicial, aínda que este último delito só para algún dos investigados. Mentres se producía o paso a disposición xudicial dos detidos, a Policía Nacional daba detalles da investigación. A pesquisas vincúlaos co alixo de 120 quilos de cocaína que foi intervido no porto de Marín. Ademais da droga, os axentes incautaron equipos profesionais de mergullo coñecidos como seascooter. Empregaban estes dispositivos para propulsarse rapidamente baixo a auga e poder acceder aos fardos ocultos nos buques.

Continúa en marcha a campaña para captar voluntarios de cara á celebración do Mundial Multisport en Pontevedra. Será do 21 ao 29 de xuño. Actualmente, a oficina que dirixe o voluntariado xa conta con máis de 300 inscritos. O obxectivo é acadar os 350 para poder cubrir correctamente as 1.700 quendas previstas.