Pontevedra

A Asociación Española Contra o Cancro celebrou hoxe unha das súas xornadas máis importantes. Un exército de voluntarios saíu ás rúas para participar na cuestación anual da entidade, e recollendo as doazóns da veciñanza. Todo o recadado contribuirá ás actividades da asociación, como é a investigación, o apoio aos enfermos de cancro e ás súas familias e á prevención.

O PSOE buscará que o concello de Pontevedra se pronuncie en contra de Altri, a macrocelulosa que se quere construír en Palas de Reis. A formación levará unha moción ao vindeiro pleno denunciando a xestión da Xunta ao redor deste proxecto que, recordan, terá impacto negativo sobre a conca do río Ulla e a ría de Arousa.

Normalidade nas comarcas de Pontevedra, O Salnés e Caldas logo do gran apagón deste luns que deixou ás escuras a Península Ibérica. Na maioría de municipios desta zona o subministro eléctrico volvía de madrugada.En zonas da cidade de Pontevedra sobre a 1, na Illa ou Vilagarcía sobre as 4, en Poio case ás 5 ou en Cambados case ás 6. Noutros concellos, como no de Sanxenxo ou O Grove, a luz non regresaba ata as 8 e media desta mañá. Durante a noite, nos municipios reforzouse a presenza policial e dos efectivos de emerxencia para garantir a seguridade da poboación.

As farmacias de Pontevedra traballarán para dar visibilidade ao lipedema, o linfedema e á insuficiencia venosa. O Colexio de Farmacéuticos da provincia porá en marcha esta campaña pioneira da man de asociacións de pacientes que padecen estas patoloxías vasculares periféricas, a día de hoxe infradiagnosticadas e moi descoñecidas. O obxectivo é que estes profesionais poidan ofrecer información e asesoramento ás persoas, derivándoas ás asociacións correspondentes e visibilizando estas enfermidades.

O festival de cómic de Pontevedra, o BDra Gráfica, volverá dar o tiro de saída ao verán cultural da cidade. Será, iso si, antes que o ano pasado. A cita tivo que adiantar a súa celebración por mor do Campionato do Mundo de Tríatlon Multideporte que a cidade acollerá a finais de xuño. Así, este ano o BDra Gráfica será entre o 22 e o 25 de maio, e volverá a traer ata Pontevedra aos principais autores de banda deseñada a nivel nacional e internacional.

O Pontevedra amarrou onte o seu ascenso a Primeira RFEF. Fíxoo fronte ao Laredo, cun resultado dun 4 a 2 ante un Pasarón ateigado de afeccionados que non quixeron perder o regreso dos granates a esta categoría. A festa trasladouse despois do campo ás prazas da cidade e continuou hoxe coa axenda máis institucional. O conxunto foi recibido polos presidentes da Xunta e da Deputación de Pontevedra e polo alcalde da cidade.

A proposta das rutas saudables organizadas pola Asociación Española Contra o Cancro volverá a Pontevedra o vindeiro mércores 23 de abril. Nesta sexta edición da actividade serán seis os roteiros por diferentes puntos do concello que se desenvolverán durante doce semanas. A iniciativa é apta para todos os públicos e totalmente gratuíta, e busca fomentar a actividade física entre as persoas máis sedentarias.

Jennifer López actuará o 8 de xullo en Pontevedra. A cantante estadounidense escolle a cidade do Lérez para arrancar en España a súa xira Up all night, despois de cinco anos sen pasar polo estado. Pouco se sabe deste concerto de relevancia internacional, que será no parque de Tafisa e no que Jennifer López interpretará os grandes éxitos da súa carreira. Pendentes aínda de que se publique a capacidade do recinto e se anuncie a saída á venda das entradas e os seus prezos, agárdase que sexa multitudinario.

O Partido Socialista de Pontevedra denuncia a confusión xerada polos novos sinais que regulan o aparcadoiro nas rúas da contorna da praza de abastos. Ata o de agora, a pesares de ser unha zona reservada a servizos, os vehículos podían quedar estacionados fóra do horario establecido. Agora só se permiten paradas dun máximo de 15 minutos entre as 8 da mañá e as 9 da noite. Dende o concello explican que se busca evitar as festas improvisadas que se montaban polas noites. Os socialistas critican que o cambio non se anunciara previamente e que os novos sinais, din, non son claros. Na fin de semana impuxéronse xa unha vintena de multas.

Pontevedra incorporará un novo servizo na súa xestión de residuos. Trátase dun punto limpo móbil que percorrerá os barrios e parroquias da cidade, no marco do novo contrato que se porá en marcha no concello. É unha unidade con dezasete puntos de recepción de distintos materiais, que van dende pilas a cargadores, pasando incluso por voluminosos.