Pontevedra

Fumata branca en Pontevedra. O concello terá orzamentos para este ano 2025. Despois de dous meses de negociación, BNG e Partido Socialista conseguiron achegar posturas para dar forma a unhas contas que acadan os 98,6 millóns de euros. O acordo entre nacionalistas e socialistas ascende aos 4,1 millóns, repartidos nunha trintena de actuacións.

Os traballadores da fábrica de ENCE en Pontevedra ameazan con ir á folga. O comité dá unha semana á dirección para abordar varias reclamacións: os problemas co estado das instalacións, as necesidades de máis persoal e a mellora das condicións de seguridade. Chegan a este punto porque, din, despois de sete reunións no 2024 a dirección segue sen tomar medidas.

A Deputación de Pontevedra repartirá 11 millóns de euros entre os concellos da comarca do Salnés e da súa contorna. Farao no marco dos plans +Provincia 2025 e do segundo Plan Extraordinario de Infraestruturas Deportivas. O presidente Luis López xa se dirixiu por carta aos rexedores para informalos destas achegas.

Os veciños de Pontevedra poderán seguir a gala dos Premios Feroz dende o Auditorio do Pazo da Cultura, moi preto de onde se celebrará o evento. O concello habilitará o espazo para seguir a retransmisión en directo, con ao redor de 700 prazas. Xa adiantaron que, ademais, haberá varias sorpresas. Tamén se instalará unha carpa na parte superior do Recinto Feiral, na zona da alfombra vermella para que se poida achegar a veciñanza.

Para a asociación Boa Vida, a campaña especial que desenvolveron no Nadal foi todo un éxito. O colectivo conseguiu recoller 11.500 xoguetes doados pola veciñanza de Pontevedra e da contorna. Deles, finalmente restauraron 8.000 que remataron ben nas vivendas das familias que lles trasladaron as súas necesidades, ou nas tendas que xestiona a asociación. Aquí están á venda a prezos reducidos co obxectivo de recadar fondos para manter as accións que impulsa Boa Vida.

Dúas agresións sexuais rexistradas nos últimos días fan saltar as alarmas en Pontevedra. Segundo deu a coñecer o Colectivo Transfeminista Fulanas producíronse na zona da Parda e na contorna do Campiño de Santa María. Hoxe convocaron unha protesta diante da comisaría da Policía Nacional en Joaquín Costa para reclamar máis protección e máis recursos para evitar novos ataques.

O BNG quere que Castelao sexa recoñecido de xeito oficial e legal como o primeiro presidente de Galicia. A formación levará ao Parlamento a proposta, recordando que dende o exilio o ilustre galeguista deseñou e presidiu o Consello de Galiza. Esta é unha das iniciativas que o BNG impulsará durante este Ano Castelao.Baixo o lema ‘Castelao nacionalista’ a formación reivindicará a súa figura cando se cumpren 75 anos da súa morte.

Xa se poden percorrer os primeiros seis quilómetros da autovía A-57.Trátase do primeiro treito que entra en servizo, entre o lugar da Ermida, na parroquia pontevedresa de Marcón, e o concello de Vilaboa. O delegado do goberno en Galicia encabezou a comitiva que inaugurou esta mañá esa infraestrutura. Pedro Blanco indicou que ante o rexeitamento da veciñanza da zona, hai varias opcións enriba da mesa para a construción do segundo treito entre A Ermida e Pilarteiros.

A deputada Isabel Couselo deixa a Deputación de Pontevedra para dar o salto á Xunta. A tamén concelleira e voceira do PP de Cuntis vai ser nomeada directora territorial en Pontevedra de Cultura, Lingua e Xuventude do goberno galego. A súa renuncia fíxose efectiva este venres no pleno ordinario celebrado no Pazo Provincial.

A campaña de 2016 en redes sociais do concello de Pontevedra #PrimAcoso foi a precursora do traballo que realiza a xornalista Cristina Fallarás. Así o asegurou ela mesma, na visita que hoxe realizou á cidade para manter unha conversa con Carme Fouces, exconcelleira de Igualdade. Fallarás recolle testemuñas de violencia machista que mulleres anónimas lle trasladan a través da súa conta de Instagram. Precisamente, unha destas mensaxes rematou coa dimisión do político de Sumar Íñigo Errejón. Xunto a Fouces, falaron sobre espazos seguros de denuncia de violencia sexual.