Pontevedra

Haberá que agardar ata mediados do 2025 para o ver o Gran Montecelo en funcionamento. É a data que manexa a Xunta de Galicia para a posta en marcha do hospital pontevedrés. Hoxe houbo unha nova visita ás obras, a primeira dos novos conselleiros de Sanidade e de Infraestruturas. Actualmente o proxecto atópase ao 75% da súa execución.

> O goberno de Pontevedra xa ten os apoios suficientes para sacar adiante a modificación de crédito na que está a traballar. O Partido Socialista anunciou hoxe que as negociacións mantidas co equipo do BNG foron frutíferas, polo que votarán a favor da aprobación. Segundo Iván Puentes, os nacionalistas aceptaron boa parte das propostas socialistas, permitindo acadar acordos por algo máis de 2,5 millóns de euros. Fumata branca no concello de Pontevedra para sacar adiante unha nova modificación de crédito. O Partido Socialista anunciou hoxe que apoiará a súa aprobación. A reforma do parque das Regas e das zonas verdes de Monte Porreiro, completar a conexión do saneamento das vivendas de Pontemuíños, a entrega de premios aos proxectos gañadores do GastroLab ou unha campaña de promoción para os comerciantes das Galerías Oliva, son algunhas das propostas do PSOE que se financiarán con esta modificación. Ademais, nesta modificación de crédito comprométense fondos para outras cuestións nas que había xa acordos previos. É o caso da axuda concedida ao Río Verbena Fest, os cartos para pagar as achegas aos clubes deportivos ou o incremento dos fondos destinados ao mantemento dos colexios públicos. A contía total da modificación de crédito que se aprobará en pleno é de 9,5 millóns de euros.

A Conselleira de Vivenda participou hoxe en Pontevedra nun acto de campaña do Partido Popular de cara as eleccións europeas deste domingo. Os populares fixeron fincapé na vivenda pública e na aposta que fará a Xunta nesta nova lexislatura. María Martínez recordou que só en Valdecorvos, na capital pontevedresa, está prevista a construción de 500 vivendas de promoción pública.

A ABAU deste ano contou con case 13.000 alumnos matriculados nos exames. Deles, 455 necesitaron algún tipo de adaptación para realizas as probas, un 36,6% máis que no ano pasado. Pero os casos que precisan recursos máis específicos realizan estes exames de acceso á universidade no Centro de Recursos Educativos da ONCE en Pontevedra. Este ano son 15 os rapaces e rapazas que se examinan neste centro contando co apoio que precisan.

200 persoas porán a proba a súa capacidade de resistencia sobre a bicicleta os días 8 e 9 de xuño. A provincia de Pontevedra acolle unha nova edición da Epic Race, con circuítos de 100, 200 e 300 kilómetros. Os participantes percorrerán diferentes concellos da provincia, facendo parada en catro: Pontevedra, Poio, Vilagarcía e Caldas.

A visión do mundo de máis de 70 fotoxornalistas de toda Galicia xa se pode visitar no vestíbulo do Pazo Provincial de Pontevedra. Hoxe inaugurouse a exposición fotográfica ‘A Galicia inédita. Un vistazo diferente do fotoxornalismo galego’, na que cada imaxe vai acompañada dun texto literario asinado por un xornalista que exerce tamén na terra. A mostra poderá visitarse ata o vindeiro 28 de xuño.

Conseguir unha xeración libre de tabaco no ano 2030. É o ambicioso obxectivo que se marca a Asociación española contra o Cancro. Pero para acadalo, precisan do apoio de institucións e colectivos. Por iso están a impulsar a Alianza do Movemento sen Tabaco, alertando dos danos desta substancia sobre a saúde e tamén do perigo que supón o incremento do uso de vapeadores entre a mocidade. Hoxe sumouse a esta alianza o alumnado do Instituto Sánchez Cantón, que se encargou de poñer voz ao manifesto.

Rematadas as obras dos viais perimetrais da praza de Barcelos, en Pontevedra. Esta mañá, o concello e a Deputación, socios para levar adiante esta intervención, escenificaron a recepción oficial dos traballos. Ademais da actuación na superficie, destaca o traballo realizado nos servizos soterrados que foron substituídos.

Oito asociacións veciñais de Pontevedra piden ao alcalde que retome as conversas coa Xunta de Galicia para construír a Variante de Alba. Miguel Anxo Fernández Lores recolleu esta demanda e esta mañá xa anunciou que se remitiu o expediente completo do proxecto á actual conselleira de Infraestruturas, María Martínez. O rexedor insistiu na relevancia desta infraestrutura.

O BNG celebrará mañá en Pontevedra un mitin no marco da campaña electoral de cara ás eleccións europeas. Será ás 8 da tarde na praza do Teucro, e participarán a número 1 da lista ao Parlamento Europeo, a voceira nacional do BNG e o alcalde de Pontevedra. Hoxe Ana Miranda e Ana Pontón estiveron tamén na cidade, tomando parte nun reparto electoral.