Pontevedra

23 novos vehículos incorporaranse hoxe mesmo á flota do servizo de residuos do concello de Pontevedra. A nova maquinaria está conformada por vehículos propulsados a gas e enerxía eléctrica. Só faltan outros sete para que o equipamento do novo contrato estea ao 100%.

Volve a Pontevedra o seu festival dedicado á cultura verde. O vindeiro 23 de maio na Alameda celebrarase o Plan Fest. Unha cita que nesta terceira edición medra. Comezará xa ás 12 do mediodía, con obradoiros, faladoiros e mercadiño. Tampouco faltará a actividade central, o intercambio de escallos, que o ano pasado reuniu a máis de 250 participantes. Polo festival pasaron ao redor de 3.000 persoas.

A protesta anual da Asociación pola Defensa da Ría contra ENCE muda este ano de formato. En lugar da tradicional marcha, a APDR convoca este ano unha manifestación polas rúas de Pontevedra. Será o 24 de maio ás 12 e media do mediodía con saída e chegada da Alameda. Con ela, o colectivo busca reclamar o enterro definitivo do proxecto de Altri en Palas de Rei.

Pontevedra prepara máis de 20 propostas culturais para celebrar ‘Maio, mes da lingua’. Son actividades para toda a familia facendo especial fincapé nas crianzas, para fomentar o uso do galego entre as novas xeracións. Para dar forma a toda a programación, o concello contou coa colaboración de diferentes colectivos da cidade.

Os Premios Feroz non cambian. Por terceiro ano consecutivo, Pontevedra volverá acoller a cerimonia de entrega destes galardóns do audiovisual estatal. Será o vindeiro 23 de xaneiro de 2027 pero tanto o concello como a Asociación de Informadores Cinematográficos de España anunciaron que haberá unha ampla programación previa, con proxeccións, charlas e coloquios que traerán ata a cidade a algúns dos persoeiros máis relevantes do sector.

En marcha unha nova convocatoria da Aceleradora Ría de Pontevedra. A iniciativa, posta en marcha pola Asociación de Jóvenes Empresarios co apoio de ENCE, busca impulsar o emprendemento nos concellos de Pontevedra, Marín e Poio. Está dirixida a proxectos sostibles e innovadores cun máximo de tres anos de actividade. O prazo para inscribirse abre mañá martes 12 de maio.

A Deputación de Pontevedra renovou hoxe o seu acordo de patrocinio co Pontevedra Club de Fútbol. A administración provincial mantén a súa achega de 160.000 euros para a tempada 2025-2026. Esta mañá celebrouse a sinatura do convenio no Estadio de Pasarón. Precisamente o mal estado do céspede centrou a atención dos asistentes. A presidenta Lupe Murillo asegurou que están a traballar no proxecto de reforma integral da drenaxe e dende a Deputación ofrecéronse a colaborar co concello, titular do estadio, nesta intervención.

Mañá, 9 de maio, celébrase o Día de Europa e a Deputación de Pontevedra quixo adiantarse a esta efeméride facendo balance dos fondos comunitarios captados por esta administración. Segundo o presidente provincial, están a impulsarse 26 proxectos cofinanciados polas institucións europeas que acadan os 43 millóns de euros mobilizados.

En Pontevedra, os veciños de Mollavao dan un paso adiante. Fartos do abandono histórico que sofre o barrio decidiron constituírse como asociación veciñal, iniciando unha xeira de reunións coas diferentes administracións que teñen competencias. Defenden que se trata dun barrio seguro, pero que os problemas de salubridade e a falta de espazos de convivencia e esparexemento, degradan as súas rúas.

Miguel Anxo Fernández Lores volverá ser o candidato do BNG á alcaldía de Pontevedra nas eleccións municipais do 2027. O nacionalista, rexedor da cidade dende o ano 1999, foi escollido por unanimidade e aclamación da militancia. Concorre a estes comicios co lema ‘Pontevedra, a por todas!’ e fai fincapé en que o seu proxecto de cidade ten moito percorrido.