NOIA

Esta mañá arrincaban os traballos de acondicionamento dos xardíns de Felipe de Castro, en Noia. A actuación, cun orzamento duns 90 mil euros, será financiada con cargo a fondos Next Generation do Plan de Sostinibilidade Turística en Destino da ARD da Ría de Muros-Noia. As obras permitirán a reparación do actual pavimento, moi deteriorado, e a mellora da accesibilidade en todo o espazo.

A secretaria xeral do PPdeG, Paula Prado, valorou esta mañá no Pico Muralla de xeito moi positivo a decisión do Tribunal Constitucional que levantou a suspensión provisional aplicada a varios puntos da lei galega referida a repotenciación eólica. Prado referiuse ó novo revés que lle dá a xustiza ó Goberno Central, despois do acontecido coa lei do Litoral, que segundo ela, o único que busca, é poñer atrancos ós intereses de Galicia.

O concello de Noia investiu máis de 60 mil euros na mellora do campo de fútbol municipal. Ademais da instalación dun equipo de aerotermia, procedeu á renovación dos vestiarios e á impermeabilización de parte da cuberta para eliminar as filtracións.

A delegada territorial da Xunta na Coruña desprazouse ata Lousame para coñecer as actuacións que se están a  desenvolver con cargo ó Fondo de Cooperación Local. Trátase da mellora da eficiencia enerxética do polideportivo e da piscina municipal, proxecto que contaron cunha axuda autonómica de 60 mil euros.

Carlos Lorenzo e Andrea Vázquez foron os gañadores absolutos do Portosín Trail, modalidade longa de 21 quilómetros, mentres que Yeray Lorenzo e Marta Vázquez vencían na distancia curta de 15. A proba, disputada onte domingo, pechaba o Circuíto Trail Series 2026 organizado por Arousa Neo.

Trescentos participantes daranse cita na undécima edición de ‘Os 100 do Barbanza’, unha das probas de ultrafondo máis esixentes de Galicia. Disputarase entre o 20 e o 21 de xuño cun percorrido de 100 quilometros a través de sete concellos das comarcas do Barbanza e Muros-Noia.

A Deputación da Coruña vén de licitar as obras de mellora do firme da estrada DP-6202, que vai de Outes ata a AC-400 por Valadares. O proxecto, unha vella demanda da veciñanza e o goberno local, conta cun orzamento de preto dos 530 mil euros.

A localidade sonense de Portosín acollerá este próximo domingo, 22 de febreiro, o Portosín Trail. Na proba, incluída no Circuíto Trail Series Arousa Neo, prevese unha participación de máis de 350 persoas, repartidos no trail longo, o curto e a andaina.

A consellería de Vivenda e Planificación de Infraestruturas proxecta unha nova senda peonil e ciclista en Outes. Construirase na estrada AC-550, entre Viro e Outes, e suporá un investimento de 1,4 millóns de euros.

Noia celebra este vindeiro domingo 22 de febreiro unha nova andaina. A proba, organizada polo Club Trabandainas, forma parte da Liga Galega de Sendeirismo. Constará de dúas rutas, unha longa de 25 quilómetros e outra curta de 15, con punto de saída e chegada para as dúas no IES Campo de San Alberto. Prevese unha participación dunhas 800 persoas.