NOIA

O concello de Noia vén de solicitar a desafectación da zona deportiva de San Lázaro. O obxectivo é que os terreos sexan de titularidade municipal para poder axilizar as melloras previstas no estadio e instalacións anexas.

O PP de Noia reivindica a súa xestión e acusa ó actual goberno de querer apropiarse daqueles proxectos encamiñados e mesmo co financiamento aprobado. Santiago Freire cifra en máis de seis millóns e medio de euros as obras en execución ou próximas a iniciarse, froito da xestión do pasado executivo.

A celebración do 8 de marzo no Barbanza acolleu actos do máis variado. Dende mobilizacións como a da Pobra ata o roteiro para poñer en valor a memoria das mulleres do mar que se celebrou en Noia.

O conservatorio municipal Felipe Paz Carbajal de Noia organiza unhas xornadas de intercambio co conservatorio de música de Lalín. A iniciativa constará de dúas xornadas, a primeira  terá lugar xa este vindeiro sábado 7 de marzo, na vila noiesa.

O concello de Noia está a executar dende hai varias semanas os traballos de instalación dos servizos de electricidade, auga e saneamento no albergue da Chaínza. A intervención, que conta cun orzamento duns 44 mil euros, permitirá a súa apertura. As previsións pasan porque os traballos estean rematados antes da Semana Santa.

Esta mañá arrincaban os traballos de acondicionamento dos xardíns de Felipe de Castro, en Noia. A actuación, cun orzamento duns 90 mil euros, será financiada con cargo a fondos Next Generation do Plan de Sostinibilidade Turística en Destino da ARD da Ría de Muros-Noia. As obras permitirán a reparación do actual pavimento, moi deteriorado, e a mellora da accesibilidade en todo o espazo.

A secretaria xeral do PPdeG, Paula Prado, valorou esta mañá no Pico Muralla de xeito moi positivo a decisión do Tribunal Constitucional que levantou a suspensión provisional aplicada a varios puntos da lei galega referida a repotenciación eólica. Prado referiuse ó novo revés que lle dá a xustiza ó Goberno Central, despois do acontecido coa lei do Litoral, que segundo ela, o único que busca, é poñer atrancos ós intereses de Galicia.

O concello de Noia investiu máis de 60 mil euros na mellora do campo de fútbol municipal. Ademais da instalación dun equipo de aerotermia, procedeu á renovación dos vestiarios e á impermeabilización de parte da cuberta para eliminar as filtracións.

A delegada territorial da Xunta na Coruña desprazouse ata Lousame para coñecer as actuacións que se están a  desenvolver con cargo ó Fondo de Cooperación Local. Trátase da mellora da eficiencia enerxética do polideportivo e da piscina municipal, proxecto que contaron cunha axuda autonómica de 60 mil euros.

Carlos Lorenzo e Andrea Vázquez foron os gañadores absolutos do Portosín Trail, modalidade longa de 21 quilómetros, mentres que Yeray Lorenzo e Marta Vázquez vencían na distancia curta de 15. A proba, disputada onte domingo, pechaba o Circuíto Trail Series 2026 organizado por Arousa Neo.