NOIA

Todo listo en Porto do Son para celebrar a Semana Santa que dará comezo este venres. Os dferentes actos que se levarán a cabo foron presentados nun acto celebrado a pasada tarde na capela da Atalaia. Contou coa presenza do párroco de Noia, José Ortoño, encargado de dar lectura ó pregón.

Noia vivirá a súa Semana Santa cun amplo programa de actividades relixiosas. A principal novidade deste ano será a estrea dun paso infantil. Unha decena de nenos da confraría do Nazareno sairán o Xoves Santo na procesión das Carracas.

O concello de Porto do Son segue a promover actuacións de aforro enerxético nas instalacións municipais. A última consistiu na substitución do alumeado do campo de fútbol grazas a unha subvención da Consellería de Presidencia.

A directora xeral de Persoas con Discapacidade visitou esta mañá as instalacións da Creba en Noia. Begoña Abeijón interesouse polo proxecto de construción da nova sede no que a Xunta leva investidos máis de 350 mil euros.

Un veciño de Noia denuncia a existencia de varios postos de telefonía que invaden a súa propiedade. A pesar de que contactou coa compañía e ofreceuse a ceder parte da súa finca para o traslado, segue sen resposta dous anos despois.

Todo preparado en Noia para acoller unha nova edición do Rali Berberecho. A cita, unha das clásicas do motor na nosa comunidade, disputarase os días 4 e 5 de abril, baixo a organización da escudería Berberecho.

Portos de Galicia habilitará 400 prazas de estacionamento na explanada de Labarta, en Noia. A actuación, que contempla a pavimentación dunha superficie de seis mil metros cadrados, suporá un investimento dun millón de euros.

A Ría de Muros e Noia será escenario un ano máis do arranque do Campionato de España de Motonáutica Inclusiva. A primeira das probas terá lugar xa este sábado 29 de marzo en Portosín. Unha semana despois a competición trasladarase a Outes, coa disputa da segunda proba do Campionato, no porto  Freixo. As dúas serán valedoiras tamén para o campionato galego.

A adxudicación da redacción do proxecto do centro de saúde de Noia supón un novo avance na tramitación desta gran obra que podería ser unha realidade a finais do 2027. A intención da Consellería de Sanidade é poder licitar as obras ó longo deste ano. O prazo de execución é de dous anos e medio.

O alcalde de Noia deu conta do bo estado das contas municipais tras aprobarse a liquidación da Conta Xeral de 2024. O superávit orzamentario supera ós 700 mil euros mentres que o remanente de tesourería rolda os 4 millóns e medio.