Barbanza - Muros - Noia

A delegada territorial da Xunta na Coruña visitou esta mañá varios centros educativos do Barbanza nos que se teñen acometido melloras. Entre eles, o CEIP Santa María do Castro que conta cun novo comedor ou o IES Félix Muriel de Rianxo no que se procedeu á renovación da carpintería exterior.

Ademais de asociacións e cidadáns anónimos, a mobilización contou coa presenza de tódalas forzas políticas agás o PP. Tamén se sumaron á protesta colectivos ecoloxistas de toda Galicia.

Ribeira celebrou onte domingo o tradicional xantar da terceira idade. A comida reuníu na Fieiteira a un milleiro de maiores. Unha cifra récord, que demostra o tirón que teñen este tipo de eventos.

A Ría de Muros e Noia será escenario un ano máis do arranque do Campionato de España de Motonáutica Inclusiva. A primeira das probas terá lugar xa este sábado 29 de marzo en Portosín. Unha semana despois a competición trasladarase a Outes, coa disputa da segunda proba do Campionato, no porto  Freixo. As dúas serán valedoiras tamén para o campionato galego.

O PSOE da Barbanza fai unha chamada tamén á mobilizacion convocada para mañá sábado, ás 12, na Pobra contra Altri. Para os socialistas barbanzáns, de levarse adiante este macroproxecto de celulosa significaría unha grave ameaza para a nosa comarca, véndose gravemente afectado o noso medio de vida e o noso futuro

A Plataforma pola Sanidade Pública do Barbanza acordou manter as concentracións dos xoves no centro de saúde de Ribeira para reclamar a incorporación de tres médicos. Así o decidiron na asemblea celebrada a pasada tarde na que tamén secundarán a mobilización convocada por  SOS Sanidade Pública o 6 de abril Compostela.

O concello de Boiro vén de sacar a licitación o proxecto de mellora do campo da Mina, en Lampón, para dotalo de herba artificial. A actuación, cun orzamento de máis de 700 mil euros, financiarase con cargo ó POS da Deputación da Coruña.

Os pobrenses teñen unha cita co tradicional Pasabares que organiza a Comisión de Festas do Carme do Castelo. Será o sábado de 29 marzo e contará coa participación dunha vintena de grupos tradicionais e outros tantos locais hostaleiros.

Máis de 500 remeiros daranse cita este domingo en Ribeira para participar na VII Bandeira de Bateis do concello. A proba forma parte da Liga Galega de Bateis.

A borrasca ‘Martinho’ deixouse notar tamén no Barbanza durante toda a noite e principalmente, a primeiras horas desta mañá. Os equipos de emerxencias tiveron traballo arreo, con numerosas incidencias, aínda que a maioría delas sen demasiada importancia.