Barbanza - Muros - Noia

A Deputación da Coruña vén de convocar a liña de axudas para autónomos con máis de 5 anos de actividade e residencia fiscal en municipios de menos de dez mil habitantes. Complementa así o PEL-Autónomos que este ano xa beneficiou a máis de mil profesionais que levan menos de cinco anos en activo.

A vindeira fin de semana, Noia converterase na capital do fútbol sala. entre o 27 e o 28 de setembro acollerá a VII edición do Trofeo Portus Apostoli. Ademais do equipo local, participarán o Palma Futsal e o Anderlecht de Bélxica.

A voceira nacional do BNG desprazouse esta mañá ata Rianxo que celebra hoxe un dos días máis emblemáticos das festas da Guadalupe co  seu feirón  mariñeiro. Alí, Ana Pontón instou ó presidente da Xunta a aceptar a condonación da débeda por parte do goberno central na reunión que manterá mañá con Pedro Sánchez.

O concello de Ribeira avanza na mellora das infraestruturas deportivas con dúas novas pistas de tenis en Saamil, na parroquia de Corrubedo. O proxecto supuxo un investimento de máis de cen mil euros.

O BNG de Noia solicitará no pleno que se dea continuidade ó proxecto de rehabilitación do IES Virxe do Mar. Trala intervención que está a piques de concluír na fachada principal demandan á Xunta que actúe tamén nos muros laterais e posterior para a posta en valor de todo o inmoble.

Unha marea Vermella invadirá Boiro o último domingo de setembro coa cuarta edición da Andaina Solidaria organizada por JEALSA. O obxectivo este ano será recadar fondos para a Fundación STOP Leucemia que permitan avanzar na investigación do cancro hematolóxico.

Xa están abertas as inscricións para participar na carreira popular Santa Uxía que se celebrará o sábado 28 en Ribeira. A organización agarda superar os 500 participantes neta 25 edición que será ademais un memorial en lembranza de Manuel Ruíz.

Controlado o incendio na parroquia sonense de Caamaño que a pasada madrugada arrasou 15 hectáreas de monte. O lume calcinou varios vehículos estacionados nas proximidades taller e achegouse moi preto das vivendas aínda que finalmente non foi preciso desaloxar ós veciños.

Aprobada por unanimidade unha proposta do PSOE de Rianxo para a creación dun espazo social nas antigas vivendas dos mestres. O proxecto, suporá un investimento de preto de 300 mil euros con cargo ó POS adicional.

A Deputación da Coruña vén de recibir unha subvención de máis dun millón de euros para poñer en marcha o programa PEL Activa. Permitirá formar a máis de 200 persoas para empregos con alta demanda no rural.