CALDAS

O concello de Caldas e a Asociación de Hostalería da vila impulsan a I Ruta de Tapas na que participan dez locais. Poderanse degustar por tan só tres euros entre este venres e o domingo. Este martes desvelaron as propostas coas que participan, poñendo en valor que están elaboradas con produtos de calidade e de quilómetro cero. Un xurado profesional e os propios clientes poderán escoller as creacións gañadoras. A cambio, entrarán no sorteo de vales de compra e dous abonos para o Portamérica.

Ata o vindeiro seis de abril está aberta a nova convocatoria de axudas Leader que xestiona o GDR Salnés-Ulla-Umia. Poden optar a estes fondos proxectos que favorezan o desenvolvemento de zonas rurais, que fomenten o asentamento de poboación ou xeren postos de traballo. Destes fondos pódense beneficiar empresas e autónomos, pero tamén asociacións, comunidades de montes e os propios concellos. A gran novidade desta edición é que a convocatoria pasou de dúas a tres anualidades.

Satisfacción no concello de Caldas ante a cancelación do proxecto da Variante Oeste. O alcalde agarda que a semana que vén o delegado do goberno oficialice ese anuncio para a partir de aí retomar o proxecto do 2008. O PP, entre tanto, garda cautela. De feito, manteñen unha iniciativa que van levar ao pleno do Parlamento a vindeira semana. Desconfían do anuncio feito polo líder dos socialistas galegos porque, din, Besteiro non é a persoa que debera ter anunciado a cancelación da Variante.

Encontro do conselleiro de Emprego co tecido empresarial de Valga e a súa contorna para dar conta das iniciativas da Xunta para este ano para potenciar a empregabilidade e a competitividade. José Gonzalez aproveitou para poñer de manifesto as políticas de emprego que pechan o círculo, conectando a formación con incentivos á contratación.

Caldas prepárase para a chegada das novas borrascas. O municipio ten a vista posta nas chuvias previstas para este venres, que poderían provocar de novo inundacións. Este mércores a vila respiraba algo aliviada, co Umia volvendo ao seu leito. No municipio mantéñense zonas inundadas, como na contorna da praia fluvial ou nas parroquias de Godos e Saiar.

Alerta máxima en Caldas ante o risco de inundacións pola crecida do Bermaña e o Umia. A Dirección Xeral de Emerxencias emitiu un aviso facendo un chamamento a extremar as precaucións logo de que este mediodía se acadase o nivel vermello na estación Bermaña-Umia, o que se traduce nun alto risco de crecidas. Co Umia xa desbordado en varios puntos, o alcalde fai tamén un chamamento a evitar riscos innecesarios.

A borrasca Joseph deixa a súa pegada nas Rías Baixas. O temporal das últimas horas foi especialmente virulento na comarca de Caldas. En Cuntis o río Gallo desbordou. Tamén rebordou o Umia ao seu paso por Caldas, inundando zonas como A Tafona. En Portas, os servizos de emerxencia tiveron que rescatar un condutor atrapado nunha pista anegada. No Salnés, co Umia tamén anegando zonas en Meis ou Ribadumia, a principal incidencia foron os cortes de luz en varios puntos, así como pequenos desprendementos. Mesma situación na comarca de Pontevedra, con danos de escasa consideración.

Alerta vermella por intensas chuvias en 16 concellos do interior da provincia de Pontevedra, entre eles, Moraña e Cuntis. Neste último, xa se produciron desbordamentos de ríos. As autoridades fan un chamamento a extremerar as precaucións e evitar desprazamentos innecesarios. O peor agárdase contra as 21:00 horas deste luns.

A Deputación de Pontevedra centra no deporte a campaña que levou este ano a Fitur. 'A túa meta, o teu destino' presentouse en Madrid como un convite para "desconectar, conectar e reconectar" da rutina, descubrindo as Rías Baixas a través do deporte. O presidente provincial estivo acompañado durante o acto do xefe do executivo galego.

Inchables, obradoiros e chocolate con churros. Con esta festa recibiu Valga aos Reis Magos. Como xa é tradición, as Súas Maxestades visitaron os arredores do Belén Artesanal para poder saudar á rapazada valguesa e recoller as últimas cartas.