Salnés - Caldas

Uns 250 deportistas daranse cita este domingo en Ribadumia na sexta edición da XCO Kiwi Atlántico. Trátase dunha proba de mountain bike cun percorrido técnico que organiza o Club Ciclista Ribadumia pola contorna desta empresa. De feito, as súas instalacións forman parte do percorrido. Este ano a proba é puntuable para o campionato galego.

A explotación do novo emisario de Montalvo xa depende do concello de Sanxenxo. A cesión desta infraestrutura formalizouse esta mañá cunha sinatura na que participaron os alcaldes Telmo Martín e Ángel Moldes, de Poio, e os responsables da empresa pública estatal Acuaes. Trátase dunha peza clave para solucionar os problemas de saneamento dos dous municipios. A construción deste emisario contou cun orzamento de 3,7 millóns de euros, incluídos nun investimento total de 24 millóns para mellorar a calidade das augas da ría de Pontevedra.

Administración, empresa e investigación son os tres piares clave para o futuro do medio rural galego. Este venres, en Cambados, as tres partes estiveron representadas na sétima Xornada Tiple Hélice, centrada na innovación e o desenvolvemento sostible. Trátase dunha iniciativa impulsada polo Foro Empresa Pontevedra, que acolleu a adega Martín Códax.

A Mancomunidade do Salnés, a través de seu plan integrado de emprego, segue formando soldadores. Trátase dun dos obradoiros con máis saídas laborais. Na súa quinta edición formáronse 10 novos alumnos. Como nas anteriores, a presenza feminina cada vez gaña máis peso nun sector tradicionalmente masculinizado. No conxunto das cinco edicións deste curso xa se formaron case 60 candidatos e candidatas.

Xa se pode visitar en Cambados unha nova edición de Saudarte. Trátase da mostra impulsada pola Fundación Galega contra o Narcotráfico, coa que se pretende fomentar o ocio creativo entre a rapazada. Unha forma de afastar aos máis novos do mundo da droga. A exposición está composta por 25 pezas. Poderase visitar ata o 20 de maio.

Comisións Obreiras e persoal do servizo de Emerxencias e Protección Civil de Sanxenxo denuncian acoso laboral no concello. Sinalan directamente ao alcalde, Telmo Martín, ao que acusan de utilizar métodos coercitivos para silenciar as demandas de mellora de medios e seguridade feitas polos traballadores. A pinga que encheu o vaso foi a apertura de varios expedientes disciplinarios por faltas moi graves. O sindicato advirte: se non se retiran, comezarán as mobilizacións. E pensan xa no verán.

Xubilados e pensionistas da CIG concentráronse este mércores ante o centro de saúde de Vilagarcía en defensa da sanidade pública. Denuncian o incremento das listas de espera, en especial na atención primaria. Apuntan que un doente non pode agardar mais de 15 días para unha simple consulta. O colectivo mantén en marcha un calendario de mobilizacións e tamén unha recollida de sinaturas.

A Mancomunidade do Salnés quere darlle un impulso ao turismo de autocaravanas. O organismo comarcal acaba de presentar un plan para crear áreas nos concellos do interior. A idea é desconxestionar os municipios costeiros fomentando este tipo de turismo en concellos como Meis, Ribadumia ou Meaño. Segundo os cálculos da Mancomunidade precisaríanse unhas 300 prazas para dar resposta a toda a demanda.

Somos Cambados e Somos Ribadumia participarán este sábado nun encontro de candidaturas municipalistas de toda Galicia. Unha reunión que se vai celebrar en Chantada e que busca avanzar na construción dunha confederación de proxectos locais de cara ás municipais de 2027. A proposta pretende crear unha coalición específica para eses comicios mantendo a autonomía de cada formación, pero intentando ser clave para a configuración das Deputacións.

Produtores e amantes do viño déronse cita en Sanxenxo na segunda edición de 'Viños a Piñon'. A xornada, impulsada polo Real Club Náutico da localidade, contou con distintas catas. Unha experiencia, explican, adicada ao descubrimento de viños menos coñecidos e singulares. No acto participaron medio cento de viticultores, hostaleiros e afeccionados.