Salnés - Caldas

Arrancan as obras do novo centro de talasoterapia do Terrón, en Vilanova. O proxecto agrupa nun mesmo complexo equipamentos deportivos e acuáticos. O futuro edificio con dous vasos e distintos servizos nun edificio de tres andares. Esta fase do talaso conta cun orzamento de 1,8 millóns de euros, dos que a Deputación de Pontevedra achega o 50% a través do Plan Extra. Este luns visitaron a zona o presidente provincial e membros do goberno local.

O Portonovo Gastronómico segue medrando. 21 establecementos, dous máis ca o ano pasado, participan este ano nesta cita impulsada polo Concello de Sanxenxo. Na ponte do 1 de maio, a localidade ofrecerá unha completa variedade de tapas, todas elas coa raia como protagonista. Ademais, salienta tamén o reforzo da programación paralela, co regreso do Raia Rock, un concerto de Treixadura ou un festival de baile con varias agrupacións locais.

Martín Códax acolleu este xoves unha xornada formativa de boas prácticas. A iniciativa, destinada aos cooperativistas da adega, busca incidir en accións que fomenten unha convivencia harmoniosa entre os viticultores, a veciñanza e o medio ambiente. Nestes momentos, por exemplo, á hora de aplicar tratamentos fitosanitarios co obxectivo de diminuír ao máximo o seu impacto en parcelas próximas a vivendas ou a leitos de ríos.

A Asociación O Castro de Baión, en Vilanova, organizou este xoves a I xornada sobre Idadismo e Lonxevidade. O colectivo quixo abordar este problema, poñendo o foco en especial na soidade non desexada. No Castro defenden a necesidade de promover o envellecemento activo dende todos os niveis da sociedade. Na xornada estiveron presentes todos os concellos do Salnés.

Mobilización en Meaño para reclamar que se retrase o acceso dos menores aos dispositivos dixitais. Co gallo do Día do Neno, a comunidade educativa dos centros do municipio concentrouse na praza do concello para dar visibilidade á alarma que existe entre as familias polo impacto das pantallas na rapazada, tanto no que se refire ao acceso a contidos non recomendados como no seu desenvolvemento social.

Valga contará cun apeadoiro ferroviario. O Adif sacou a licitación a redacción do proxecto para construír esta parada no concello, na liña convencional que une A Coruña e Vigo. O orzamento é de algo máis de 200.000 euros e unha vez adxudicado o contrato terá unha duración de 39 meses. Con este anuncio, o Goberno do Estado dá cumprimento a unha demanda histórica do municipio valgués. Hoxe visitou o concello o delegado do executivo central en Galicia, Pedro Blanco.

A vicepresidenta segunda do goberno clausurou este mércores en Vilagarcía o Congreso Nacional de Relevo Xeracional organizado por UPTA. Yolanda Díaz reivindicou a necesidade deste foro na procura de solucións a un problema real. Entre as medidas que defenderon, a regularización das persoas migrantes que, entenden, permitirá garantir a continuidade de negocios e postos de traballo.

A veciñanza de Ribadumia ten unha cita o vindeiro 10 de maio na Festa da Familia. A xornada inclúe distintos tipos de actividades de lecer, educativas e culturais. O obxectivo é promover a convivencia familiar e veciñal e fomentar os valores da inclusión e a saúde. Nesta proposta inclúense, por exemplo, distintos xogos, postos informativos de distintas asociacións e mesmo un contacontos para a rapazada.

Daniel é un veciño de Vilagarcía que leva máis dun ano loitando para que o seu pai teña unhas condicións de vida dignas despois de sufrir unha neglixencia médica. Ingresou no Montecelo por unha pancreatite e alí administráronlle metamizol, un medicamento ao que é alérxico tal como figuraba no seu historial. Sufriu unha parada cardiorrespiratoria e quedou en coma. As consecuencias foron tremendas: dano cerebral con deterioro cognitivo e tetraparesia. Agora a súa familia enfróntase a unha batalla co seguro ao que reclaman 1,5 millóns de euros.

Autónomos de toda España déronse cita este martes en Vilagarcía no II Congreso Nacional de Relevo Xeracional. Trátase dun foro impulsado por UPTA no que axentes sociais, representantes institucionais e expertos puxeron sobre a mesa solucións ante o reto da remuda de emprego autónomo e a continuidade dos negocios. No congreso abordáronse cuestións clave como a formación, a empregabilidade no rural ou políticas públicas para garantir a continuidade do traballo autónomo.