Salnés - Caldas

Comeza a funcionar o albergue de peregrinos de Carril. Trátase do primeiro que se pon en servizo na ruta do mar de Arousa e o río Ulla. Coincidindo coa súa apertura, visitaron as instalacións o director de Turismo de Galicia e o alcalde de Vilagarcía. Xosé Merelles e Alberto Varela salientaron que neste proxecto a cooperación entre administracións foi fundamental.

A Plataforma en Defensa da Ría de Arousa carga contra a posibilidade de que os fangos da dragaxe do Lérez rematen a escasas millas de Sálvora. O colectivo di que as localizacións que se están a estudar para esas verteduras son letais, porque as correntes arrastran os sedimentos de menor tamaño e máis contaminados cara o interior da ría. Como alternativa, dende a PDRA propoñen outra zona cunha profundidade de 150 metros para depositar residuos. Iso si, só os que proveñan da ría de Arousa e sempre e cando non sexan contaminantes.

O PP de Vilagarcía denuncia o que consideran continuas mentiras do goberno local. Os populares aseguran que o executivo de Alberto Varela faltou á verdade en asuntos como o asfaltado da rotonda do Cavadelo ou na perda de subvencións. Pídenlle aos socialistas que asuman as súas responsabilidades, que rectifiquen ou que dimitan.

O enoturismo centrou o XIII Foro do Albariño e curso de verán da Universidade de Santiago que acolle Terra de Asorei, en Meis. Pola adega están a pasar estes días expertos chegados de distintos puntos de España para abordar o enoturismo como unha ferramenta para preservar a cultura propia e impulsar as economías locais. O foro rematará este sábado en Cambados.

Xa está aberta ao tráfico en Sanxenxo a nova vía que une as rúas Progreso e Sanxenxo. Trátase dunha rúa que aínda non ten nome, que suporá un alivio para o tráfico nos meses de verán. Conta con 60 prazas de estacionamento. A creación desta vía e das zonas verdes anexas forman parte do proxecto de desenvolvemento urbanístico desta zona, é dicir, foi executada polas construtoras que, no futuro, farán edificios nas parcelas desas rúas.

A veciñanza de Carracedo, en Caldas, reclama dous pasos de peóns para a concorrida N-550, que atravesa a parroquia. Denuncian que tanto eles como os milleiros de peregrinos que fan o Camiño Portugués vense obrigados a atravesar a estrada a diario poñendo en perigo a súa seguridade. Acaban de iniciar unha campaña de recollida de sinaturas para reclamar ao Ministerio de Transportes que atenda dunha vez esta vella reivindicación.

Remataron os traballos da nova senda peonil entre as parroquias de Bamio e Carril, en Vilagarcía. Trátase de medio quilómetro no que tamén se creou un acceso ao cemiterio carrilexo a través dunha pasarela. A xunta investiu nesta obra 330.000 euros. Esta mañá visitaron a zona o alcalde e a conselleira de Infraestruturas. María Martínez Allegue avanzou que se lle vai dar continuidade a este novo itinerario ata o núcleo urbano de Carril.

Máis de 3.300 sinaturas demostran o apoio ás reclamacións das familias do colexio do Piñeiriño, en Vilagarcía. Demandan á Xunta de Galicia o desdobre dunha aula de infantil, a de cuarto. Explican que hai 19 alumnos, tres con necesidades especiais. Eles computarían o dobre polo que se superaría a ratio establecida de 20 pequenos por aula. Hoxe presentaron as sinaturas na delegación da Xunta en Pontevedra.

A Deputación de Pontevedra financiará integramente a renovación da rúa Bouza de Abaixo, en Vilaxoán. A actuación suporá un investimento de máis de 770.00 euros. A intención do concello é sacala a licitación en agosto. A obra, moi demandada pola veciñanza da zona, suporá a transformación total do vial, coa creación dunha plataforma única. Tamén se aproveitará para renovar as acometetidas do saneamento.

Sanxenxo xa presume das súas oito bandeiras de sendeiros azuis. Esta mañá o alcalde e a conselleira de medio ambiente izaron unha desas insignias na Ruta dos Carballos de Aldariz. Telmo Martín e Ángeles Vázquez salientaron que Sanxenxo, ademais de ser o municipio de España con máis bandeiras azuis nas súas praias, é tamén o concello con máis sendeiros azuis. O alcalde comprometeuse a conseguir máis distintivos, implantando un novo sendeiro azul cada ano.