Salnés - Caldas

Conta atrás en Ribadumia para a Festa do Tinto do Salnés. A festa, que celebra este ano 52 anos de historia, prolongarase do 5 ao 8 de xuño. Como todos os anos, o evento reúne tódolos ingredientes para que sexa un éxito. Ademais de bo viño, a programación inclúe a visita de grandes orquestras e o grupo A Roda.

Nace a campaña 'Vilagarcía 100%'. Trátase dunha iniciativa turistica que pon en marcha o concello de vilagarcía exclusiva para os vilagarciáns. Vanse ofertar 1.300 prazas para dar a coñecer a riqueza natural e histórica da vila de xuño a novembro. Haberá visitas a Cortegada, obradoiros, rutas e xincanas. Todas as actividades serán gratuítas.

Máis de 400 participantes daranse cita na sétima edición da Mini BTT Concello de Ribadumia. As probas van ter lugar este vindeiro domingo no no campo de fútbol de Leiro. Alí vanse desenvolver as distintas probas, de diferentes categorías, de rapazada de entre 4 e 14 anos. Na presentación da proba, salientaron que o evento vai mellorando, gañando cada vez máis peso no calendario deportivo da zona.

O ribadumiense Luis Serantes, novo director xeral da Mutualidad de Futbolistas. Despois de nove anos traballando para esta entidade, a xunta directiva decidiu poñelo á fronte para liderar esta nova etapa. O seu principal aval para este nomeamento foi precisamente o seu coñecemento sobre o funcionamento da organización.

As campañas de prevención contra a loita machista de cinco concellos da provincia de Pontevedra, entre eles Sanxenxo, levarán a firma do alumnado da Universidade de Vigo. Trátase dunha iniciativa pioneira que nace da colaboración entre a universidade e a Subdelegación do Goberno. No seu marco, o alumnado do máster de Publicidade foi o encargado de deseñar estas campañas, que se desenvolverán nos municipios seleccionados co gallo do 25 de novembro.

Xornada de circulación intensa no centro de Vilagarcía polo reasfaltado na avenida de Xoan Carlos I, a que pasa por diante do Concello. Trátase dunha actuación moi necesaria, polo mal estado que presentaba o pavimento nesa zona. O treito forma parte da N-640A, unha estrada que presenta deficiencias tamén noutros puntos. O alcalde recoñece incomodidades no tráfico, pero salienta que os traballos se executaron en apenas dous días.

Os nacionalistas denuncian a intención da Xunta de trasladar un ano máis a ambulancia medicalizada do Hospital do Salnés para Sanxenxo durante os meses de verán. Reclaman unha propia para ese municipio e O Grove para non deixar desatendida, din, o resto da comarca. Esta mañá iniciaron unha recollida de sinaturas en Vilagarcía.

A cruz foi roubada nunha xornada indeterminada da semana pasada. Persoas que adoitan camiñar pola zona dirixíronse ao concello de Vilagarcía para denunciar os feitos. O goberno local lamenta o sucedido e considera a súa desaparición como un acto vandálico. A cruz é un dos grandes símbolos de Vilagarcía, situada nun dos principais recursos turísticos do municipio.

Sanxenxo impulsa a súa primeira mostra internacional de cinema. O concello pon en marcha 'Sanxenxo de cine', unha iniciativa que traerá á vila catro filmes de renome a finais de xuño. Entre eles, Sirát, a última película de Oliver Laxe, premiada esta pasada fin de semana no festival de Cannes. A mostra, explicaron esta mañá, ten vocación de continuidade.

Os usuarios da Asociación LAR Pro Saúde Mental bótanse á rúa para loitar contra os estigmas e os prexuízos. Organizaron en Vilagarcía unha actividade deportiva en plena praza de Galicia. A través do baloncesto, os membros desta entidade tiveron ocasión de achegarse á xente da rúa e rachar mitos ou prexuízos.