Salnés - Caldas

Nova xornada de folga en toda Galicia das traballadoras das residencias. No Salnés, convocadas pola CIG, organizaron concentracións diante das resistencias ServiSenior e Divina Pastora, en Vilagarcía. Despois levaron as súas reivindicacións ao centro de DomusVi en Ribadumia. Reclaman un novo convenio, con melloras nas súas condicións e un incremento salarial. Esta é a terceira das catro xornadas de folga que teñen convocadas.

Vilagarcía proponnos gozar dunha ruta de tapas e compras. Zona Aberta impulsa esta iniciativa, na que a hostalería e o comercio van da man. Nesta ruta participan 11 locais. Como é habitual neste tipo de rutas, a clientela poderá ir facendo un percorrido por eles para optar a premios. A singularidade é que para iso terán que pasar tamén por outros dous establecementos comerciais adheridos ao colectivo. A ruta bota a andar este venres.

Vilanova celebra unha nova edición do Festival da Francofonía. Máis de 2.000 mozos e mozas de 24 centros de toda Galicia, entre eles tres do municipio, déronse cita no pavillón municipal neste encontro. O festival serve para unir lazos entre os estudantes de francés dos distintos institutos. Tamén para reivindicar que se fomente a aprendizaxe dunha segunda lingua estranxeira na ESO, algo que en España non é obrigatorio.

O Concello de Meis celebrará o Día das Letras Galegas cunha romaría. Vaise celebrar na Casa de Parga, cun especial protagonismo para as pandereteiras e cantareiras. A festa arrancará xa a media mañá, coa intención de que a veciñanza vaia alí pasar o día e comer de campo. As actuacións musicais iranse sucedendo ao longo de todo o día, con formacións locais. O peche da xornada virá da man das Lembranzas.

Xa está aquí o vídeo de presentación das Festas de San Isidro o Labrego, unha peza audiovisual coa que a comisión de festas inicia a conta atrás para un dos días máis agardados nesta parroquia vilanovesa. Este ano, fano cunha parodia da Casa de Papel. A festa vai ser o 17 de maio, incluíndo entre as súas propostas o reparto de chourizos con pan de millo ou o tradicional desfile de tractores.

Continúan as humanizacións na contorna das Casas Modernistas da Illa. As melloras acometeranse na rúa Marqués de Bradomín, Alcalde Graña e na praza interior do Naval. Contan cun investimento de medio millón de euros, financiadas ao 100% pola Deputación de Pontevedra. A actuación contempla tamén a creación dun pequeno anfiteatro ao aire libre para actividades culturais de tamaño reducido.

Xa está aquí a quinta edición da Romaría da Música de Ribadumia. O evento vaise celebrar este domingo na carballeira da localidade. Na cita deste ano van participar a banda Xironsa, Os Firrás do Grove e a banda Unión Musical de Allariz. A programación complétase con multitude de propostas gastronómicas e actividades para a rapazada.

Esta mañá clausurouse en Ribadumia unha nova edición do Obradoiro de impresión 3D multicor impulsado pola Mancomunidade do Salnés. Neste curso participaron oito alumnos, que aprenderon a crear prototipos e obxectos en múltiples tons.

Normalidade nas comarcas de Pontevedra, O Salnés e Caldas logo do gran apagón deste luns que deixou ás escuras a Península Ibérica. Na maioría de municipios desta zona o subministro eléctrico volvía de madrugada.En zonas da cidade de Pontevedra sobre a 1, na Illa ou Vilagarcía sobre as 4, en Poio case ás 5 ou en Cambados case ás 6. Noutros concellos, como no de Sanxenxo ou O Grove, a luz non regresaba ata as 8 e media desta mañá. Durante a noite, nos municipios reforzouse a presenza policial e dos efectivos de emerxencia para garantir a seguridade da poboación.

Tres persoas detidas no Grove pola vaga de roubos dos últimos días na vila. Un deles foi pillado na allada mentres estaba roubando nunha vivenda na zona do Con. Trátase do mesmo individuo que días antes entrou na Taberna de Beli. A Garda Civil fixo nas últimas horas varios rexistros, que permitiron recuperar moitos dos obxectos roubados. As investigacións continúan abertas e non se descartan novas detencións.