Salnés - Caldas

O alcalde de Caldas deixará nos vindeiros días o bastón de mando no municipio. Así o anunciou hoxe José Manuel Rey nunha entrevista en Radio Arosa. Fíxoo precisamente no día no que se cumpren 18 anos dende a súa chegada ao cargo. Rey explicou que se trata dunha renuncia voluntaria. Xa hai uns meses adiantara a necesidade de dar cabida a novos proxectos e liderados. Todo apunta a que trala marcha de Juan Manuel Rey será o número dous da candidatura socialista, Jacobo Pérez Gulín, quen se converta no novo alcalde de Caldas de Reis.

Visita do subdelegado do Goberno a Caldas de Reis. Abel Losada coñeceu sobre o terreo o proxecto impulsado dende o concello para recuperar a súa carballeira. A iniciativa conta cunha achega de 1,45 millóns de euros do Goberno do Estado, financiada con fondos europeos Next Generation. Unha aposta, dixo, polo desenvolvemento turístico e cultural.

Coñecer de xeito inmediato a calidade das augas das nosas rías e controlar os produtos do mar. Son dous dos obxectivos do Intecmar, o Instituto Tecnolóxico para o control do medio mariño de Galicia. Ata as súas instalacións en Vilaxoán chegan a diario ducias de mostras de todo tipo, de auga ou de recursos marisqueiros, para seren analizados. Para iso o Intecmar conta cunha ampla rede de captación de mostraxes, a través de barcos ou coa colaboración das diferentes confrarías de pescadores.

Os comerciantes da contorna da praza de Asorei, en Cambados, unen forzas para esixir ao Concello que reabran a zona ao tráfico. Os vendedores din que o peche está a afectar as vendas nos seus negocios. Critican que o peche se fixo sen contar con eles e sen ningún tipo de planificación. Logo de recoller 700 sinaturas e propoñerlle ao goberno local unha ducia de medidas, lamentan que o concelleiro responsable do peche, Jose Ramón Abal, non sente falar con eles.

Meis prepárase para un dos seus grandes clásicos do Nadal. Falamos da Feira do Galo de Curral, unha cita que terá lugar o vindeiro día 22 no Mosteiro. As criadoras calculan que este ano venderán uns 250 exemplares, a un prezo de 12 euros o quilo. Para animar as vendas o Concello organiza de forma paralela para ese día un Mercado de Nadal e a visita de Papá Noel.

O Grove está de loito pola morte de Jose Rey Domínguez, un bateeiro de 75 anos. Faleceu esta mañá logo do afundimento da embarcación Hermanos Rey. Os outros dous tipulantes, a súa filla -e patroa- e o seu xenro foron rescatados con vida. O barco foi a pique contra as 8 e media desta mañá cando volvían cara a Porto Meloxo. Logo de cargar mexillón, estaban a manipular a carga co guindastre, o que provocou que envorcara.

O goberno central garantirá a seguridade dos bateeiros durante a extracción da mexilla. Esta mañá asinouse en Vilagarcía unha instrución de servizo que vai regular esta actividade que, ata o de agora, se estaba a levar a cabo en precario por falta dunha norma axeitada. A nova regulación permitirá aos bateeiros regularizar as súas embarcacións para navegar fóra das augas abrigadas. Deste xeito ponse fin a unha vella reivindicación do sector.

Xa se coñecen os detalles do ERE extintivo que o Grupo Hotusa quere aplicar no Hotel Balneario Eurostars Illa da Toxa, no concello do Grove. Dos 36 traballadores que ten no cadro de persoal, a empresa manterá dez. Pola contra, despedirá a 21 e non renovará contrato a outros cinco. Para a CIG, esta proposta é inasumible e xa anunciou que levará as condicións ante os tribunais para reclamar a súa nulidade. Mentres, continuarán coas mobilizacións e a folga.

O BNG de Cambados fale de descoordinación entre os grupos que compoñen o executivo, recoñecendo que a acción de goberno se limita a unha sucesión de improvisacións. Aseguran que levan meses advertindo da situación e que a pinga que reborda o vaso foi a moción sobre a adquisición do pazo de Montesacro que, segundo eles, foi modificada nunha reunión clandestina sen contar co Bloque.

A actuación contempla a renovación de 200 ventás e a renovación do mobiliario da cafetería. Ademais, acondicionarase o aparcadoiro, instalando tamén catro puntos de recarga para coches eléctricos.