Salnés - Caldas

Un dos tríos máis queridos da actualidade despediuse onte do seu paso pola televisión. Despois de 400 programas, os Mozos de Arousa abandonaron onte o programa Reacción en cadena. Raúl Santamaría, Borjamina e Bruno Vila caeron ante ‘Los Alhambraos’. Marchan, iso si, despois de gañar 2,6 millóns de euros de premio e convertidos en profetas na súa terra. O concello de Vilagarcía xa anunciou que darán as badaladas de fin de ano no municipio, na tradicional convocatoria das 12 do mediodía.

Vilagarcía apoia por unanimidade as demandas da comunidade educativa do colexio de Vilaxoán. No pleno de onte, a corporación comprometeuse a reclamar á Xunta a incorporación dun experto en Pedagoxía Terapéutica e un coidador. Persoal que consideran necesario para que o alumnado reciba a atención que precisa, tendo en conta que o centro conta cun 31% de nenos con necesidades especiais.

O Concello de Sanxenxo decidiu pintar de azul o vial que tamén entrou dentro dese proceso expropiatorio. Son máis de 1.200 metros cadrados polos que, xunto cos 1.700 da zona verde, Sanxenxo tivo que pagar 13 millóns de euros. Un pagamento que, por certo, xa foi completado. Agora buscaranlle un uso social a este espazo.

Nun almorzo informativo en Vilagarcía cos medios de comunicación da zona, o presidente da Deputación de Pontevedra fixo balance do feito neste último ano nas comarcas do Salnés e Caldas. Luis López cifrou o investimento en máis de 30 millóns de euros, a través de programas como o +Provincia, o Plan Extraordinario de Infraestruturas Deportivas, o PON2030 ou en diversas actuacións do servizo de Infraestruturas.

Unha vintena de novos profesionais do sector da hostalería xa están listos para entrar no mercado laboral. Hoxe a Mancomunidade do Salnés despediu unha nova edición do seu obradoiro de hostalería, que acadou xa as 15 edicións. Unha iniciativa que ten demostrado o seu éxito co paso do tempo e para a que a Xunta de Galicia destinou 580.000 euros.

Desde a súa posta en marcha hai apenas dúas semanas, o novo Polo de Em prendemento de Vilanova xa está acompañando 40 proxectos. Trátase dun servizo que presta de xeito gratuíto apoio e asesoramento a calquera persoa que desexe emprender un negocio ou consolidar o que xa ten en funcionamento. Co de Vilanova, a rede conta xa en toda Galicia con 15 oficinas deste tipo.

Unha investigación liderada polo CIMA, o Centro de Investigacións Mariñas asentado en Vilanova, busca un berberecho máis resistente. O proxecto pretende obter marcadores moleculares da resistencia da salinidade deste bivalvo. E todo nun contexto no que cada vez son máis frecuentes episodios de baixa salinidade nas nosas rías, polos desaugues dos encoros ou fortes episodios de chuvia.

Case unha vintena de alumnos aprenden a manexar minipás e retroexcavadoras grazas ao programa integrado de emprego da Mancomunidade do Salnés. Ademais de formación en carretilla frontal, no programa tamén se inclúe o manexo da retráctil. Neste curso salienta tamén o incremento da presenza feminina, que acada xa o 33%.

A Ruta do Viño Rías Baixas segue sumando recoñecementos. Acaba de facerse con dous galardóns no marco da sétima edición dos Premios de Enoturismo das Rutas do Viño de España. O proxecto de Enoturismo a pedais foi recoñecido como a Mellor Iniciativa Enoturística. Ademais, as Adegas Fillaboa, da Subzona do Condado do Tea, foi considerada como o Mellor Rincón Enoturístico.

Ribadumia conmemora o Día da Infancia. A rapazada do colexio Julia Becerra Malvar participou en distintas actividades para celebrar esta data. Acompañados polo alcalde, deron tamén lectura a un manifesto para reivindicar os seus dereitos, comezando por algo tan simple como o dereito que deberían ter todos eles a ser felices.