Salnés - Caldas

A Ministra de Defensa, en Valga. Margarita Robles visitou esta mañá as instalacións de Urovesa. Alí mantivo unha longa reunión de traballo coa dirección da compañía. Trátase dun factoría onde se fabrican os vehículos todoterreo polivalentes do Exército de Terra que operan en distintas zonas de conflito.

O Salnés volve celebrar un novo récord en materia turística. A Mancomunidade fixo públicos hoxe os datos do mes de agosto que confirman o éxito do destino: recibiu 815.000 visitantes, dos que máis de 430.000 pernoctaron nalgún dos concellos. Con estas cifras sobre a mesa, o ente comarcal cre que o turismo non pode medrar máis no verán, por iso concentrarán gran parte dos seus esforzos na desestacionalización.

A Xunta vén de asinar un convenio de colaboración coa sociedade Recursos de Galicia para desenvolver actuacións que permitan reducir os custos enerxéticos das empresas implantadas nos polígonos industriais e nos portos pesqueiros galegos. O acordo pechouse hoxe, nun acto que se celebrou no porto cambadés de Tragove. Un paso máis, aseguraron, cara a descarbonización e na aposta pola economía azul.

A Xunta reabre o debate sobre a posible fusión de concellos. O goberno galego presentará este xoves un informe no que propón sete posibles fusións. Na nosa zona de cobertura habería dous casos: a unión de Noia con Lousame e a de Sanxenxo con Meaño.

En Vilagarcía, a Casa do Concello pode chegar a reduci-la súa factura da luz ata nun 50% grazas aos seus novos paneis de enerxía solar. Foron instalados na azotea do consistorio. Segundo estiman, o novo equipamento produce uns 20 kilovatios. Detrás deste proxecto está o obradoiro de emprego Labora Xove de enerxías renovables.

Os afeccionados ao mundo do motor déronse cita este domingo en Vilagarcía. A cidade acolleu a segunda edición da concnetración Ride’N Nice, unha iniciativa aberta a todo tipo de vehículos, sen importar marca ou a súa idade. No evento participaron uns 200 coches.

Unha Lei do Viño e contratos homologados para dar estabilidade ao sector vitivinícola e conseguir mellores prezos. Son dúas das medidas incluídas na batería de iniciativas que o BNG trasladará ao Parlamento de Galicia. Ana Pontón visitou esta mañá a adega Martín Códax, mergullada de cheo na campaña da vendima.

A estratexia turística do norte de España decídese en Cambados. O Pazo de Fefiñáns acolleu esta mañá unha xuntanza entre Galicia, Asturias, Cantabria e Euskadi para trazar a súa estratexia común de promoción do turismo verde. Sobre a mesa, entre ourtros asuntos, o desenvolvemento do denominado Corredor do Ecoturismo. Este encontro, por certo, abriu tamén unha fenda entre a Xunta e o goberno local de Cambados. Ao alcalde, que non fora convidado, quixo sumarse hoxe á xuntanza, pero non lle permitiron a entrada.

Xa está operativa a nova base da ambulancia medicalizada do 061 no Hospital do Salnés. As instalacións, renovadas e máis amplas, recibiron hoxe a visita do conselleiro de Sanidade. Un acto que se fixo coincidir co retorno da ambulancia medicalizada a este centro hospitalario despois de operar durante todo o verán dende Sanxenxo. A pesares da polémica, dende o 061 non aclaran se esta medida se volverá repetir o vindeiro ano.

O Capítulo da Orde da Ameixa estreou este ano localización. A cita celebrouse no Pazo da Golpelleira, en Vilagarcía, despois da ruptura entre a directiva dos Parquistas de Carril e a confraría. O que non cambiou foi a esencia do acto, no que se nomearon as novas donas e cabaleiros que xa son membros da orde.