Salnés - Caldas

O Concello da Illa e a empresa pública Acuaes asinaron esta mañá o convenio que impulsa a construción da nova depuradora de Niño de Corvo. Unha actuación que busca acabar cos problemas no tratamento das augas residuais no municipio, o que provocou no 2018 un procedemento de infracción pola Comisión Europea. Trala sinatura do convenio, anunciouse que este mesmo martes sairán a licitación estes traballos, cun orzamento de 8,5 millóns de euros. Na sinatura desta mañá non estivo presente a metade do goberno local, do BNG, que o considera un acto de campaña do PSOE.

Vilanova beneficiarase dunha axuda de Turismo de Galicia para a mellora do borde litoral na parroquia de San Miguel de Deiro. En concreto, son 80.000 euros que permitirán a instalación dunha pasarela nun treito da senda en Rego do Alcalde. A previsión é que estea rematada para o verán de 2025.

87 equipos participarán na cuarta edición da Copa Ribadumia- Clae Viajes de fútbol nas categorías infantil e xuvenil. Será no mes de xuño, nas fins de semana do 14 ao 16 e do 21 ao 23, co campo da Senra como escenario. O torneo volverá atraer a conxuntos chegados de toda España e Portugal. Unha cita que promete ser, un ano máis, un importante pulo ao turismo na zona.

Os concellos das comarcas de Salnés e Caldas recibirán 2 millóns de euros da Deputación de Pontevedra para mellorar os seus equipamentos deportivos. Vilagarcía é o municipio máis beneficiado, cunha achega de 206.000 euros repartidos en tres obras. O Grove, Cambados, Catoira, Moraña e Vilanova son outras das vilas que recibirán fondos desta liña de axudas.

Todo listo en Ribadumia para que arranque a LI Festa do Tinto do Salnés. Vai arrancar o vindeiro xoves, con boas expectativas en canto a participación. E non é para menos porque a cita reúne todos os ingredientes para que sexa un éxito. Ademais do bo viño, ata a Festa do Tinto achegaranse as mellores orquestras galegas, enchendo de troula Ribadumia durante catro días.

A adega Martín Códax é estes días sede do Foro Mundial de Cooperativas Vitivinícolas. Trátase do evento máis importante a nivel mundical para o sectore vitivinícola. Un espazo no que se debate arredor do modelo económico, social e colaborativo das cooperativas.

Cambios importantes na Garda Civil na comarca do Salnés. A oficina de atención cidadá de Vilanova elévase a posto. Ao tempo, suprímese o que o instituto armado tiña en Vilagarcía. Estes cambios recóllense nunha resolución publicada no Boletín Oficial da Garda Civil, que hoxe deu a coñecer o alcalde de Vilanova.

SANXENXO>  Sanxenxo estuda a creación dun aparcadoiro disuasorio con autobuses lanzadeira. É un dos titulares que deixa o almorzo informativo que organizou esta mañá...

Os concellos de Cambados e Ribadumia únense pola quinta edición do torneo de ximnasia rítima que organiza o Club Grand Jeté. A cita vai ser no pavillón municipal da Senra, en Ribadumia, este vindeiro sábado. Alí daranse cita unhas 250 participantes chegadas de diferentes puntos de Galicia.

Vilagarcía viviu onte o día grande de Santa Rita. Milleiros de persoas inundaron a cidade nunha xornada festiva, coa procesión como o evento máis multitudinario do día.