SALNÉS

Martín Códax fai entrega da recadación dos Xoves de Códax a cinco entidades sociais. En total, a adega entregou 45.000 euros, a repartir entre a Fundación Xoán XXIII, Dano Cerebral Galicia, Párkinson Galicia A Coruña, Art for Dent e Igaxes. Dende a posta en marcha do ciclo dos Xoves, a cooperativa supera xa os 350.000 euros achegados a asociacións e proxectos sociais.

O goberno local ameaza con demandar a Patrimonio se non se desbloquea este proxecto no prazo dun mes. En concreto, Ravella pídelle a ese departamento autonómico que o inmoble quede exento de necesitar a súa autorización para a súa rehabilitación. Algo que descartaba este xoves o delegado da Xunta en Pontevedra porque, lembra, trátase dun ben catalogado. Pablo Fernández lamenta a actitude do concello vilagarcián, ao que di tender a man na procura de avances.

A Xunta presentou este xoves novos detalles da nova rede de residencias que se vai construír en Galicia. En todo o territorio prevese a craeción de 25 novos centros, con máis de 1.800 novas prazas. Ademais da de Ribeira, contémplanse 12 lotes repartidos por Galicia, cunha residencia de máis de 100 prazas e outra máis pequena, situada nun concello próximo á grande para optimizar recursos. No caso do Salnés, o proxecto inclúe un lote: o equipamento principal en Sanxenxo e outra de menor tamaño, denominada ‘satélite’ en Cambados.

O Carril xa presume de escudo. Trátase dunha réplica en pedra da insiginia do antigo concello, que foi instalada na praza da Liberdade, unha vez foi retirado da zona o vello transformador eléctrico. O concello de Vilagarcía investiu neste escudo de 16 metros cadrados uns 17.000 euros. Hai uns meses xa se instalou un semellante en Vilaxoán.

A adega ATTIS conmemora o seu 25 aniversario. Este martes, organizou en Meaño un acto conmemorativo para repasar este primeiro cuarto de século de traxectoria. Neste tempo, esta adega familiar foi expandindo o seu proxecto, elaborando viños brancos e tintos cun total de 20 marcas. Ademais, está presente a día de hoxe en 25 países.

A Xunta declara Proxecto de Interese Autonómico a ampliación das instalacións de Adegas Martín Códax. A cooperativa ten prevista unha actuación que abarca máis de 47.000 metros cadrados, cun investimento de máis de 18 millóns de euros. O proxecto busca adaptar as distintas áreas ao incremento da súa capacidade produtiva. Tamén se habilitarán novos espazos para a área de enoturismo.

Posta de longo das novas instalacións de Mariscos Gilmar, en Vilanova. A compañía investiu 1,2 millóns de euros na ampliación da súa planta no polígono de Tremoedo. Con 40 anos de traxectoria especializada na transformación e produción de polbo, Gilmar abre agora unha nova etapa, coa incorporación de nova tecnoloxía, a mellora dos procesos produtivos e o avance cara a novos mercados.

A Mancomunidade do Salnés clausura a décimo cuarta edición do seu Programa Integrado de Emprego superando todas as expectativas de inserción laboral. Actualmente, 83 dos 100 candidatos xa están traballando. Cando no arranque do programa o obxectivo era de 45. Unhas cifras que acreditan o bo funcionamento desta iniciativa, que articulou a realización de 30 cursos, 9 obradoiros de emprego e máis de 600 orientacións laborais.

O alcalde de Vilagarcía formalizou este luns a denuncia contra o home que o agrediu esta fin de semana nun local hostaleiro da cidade. O varón atacou a Alberto Varela propinándolle dous golpes nas costas e agarrandoo polo pescozo ao berro de ‘rojos de mierda’ e ‘iros de putas con Ábalos’. O socialista asegura que reflexionou sobre presentar ou non a denuncia. Asegura que o fai como xeito de chamar a atención sobre a gravidade que ten normalizar o insulto por razóns ideolóxicas e a escalada violenta que se está a producir como consecuencia.

Pedro Sánchez arroupa a Festa do Marisco do Grove na súa xornada inaugural. Horas antes de participar no Foro da Toxa, o presidente do goberno visitou a carpa gastronómica no arranque desta 63 edición entre apupos e aplausos. Estivo acompañado de distintas autoridades, entre elas, o alcalde do Grove e outros rexedores da zona, así como o secretario xeral dos socialistas galegos. Calcúlase que unhas 100.000 persoas pasarán por este evento ata o vindeiro 12 de outubro.