SALNÉS

O Concello de Ribadumia conta xa co seu primeiro protocolo de prevención fronte o acoso laboral, sexual ou por razón de sexo. O documento busca servir de folla de ruta na prevención ante calquera tipo de violencia dentro do concello, buscando promover tamén un clima laboral o máis respectuoso e igualitario posible.  Hoxe tamén se constituíu a súa comisión de seguimento, na que están presentes a parte institucional, sindical e técnica.

Xa se pode visitar en Vilagarcía a exposición 'Especies varadas'. Trátase dunha mostra do artista Sergio Ordóñez, que crea arte con lixo mariño. Anacos de cerámica, madeira e, por suposto, moito plástico danlle forma a unha colección de cadros e esculturas nas que os refugallos se transforman en pezas que convidan ao espectador a reflexionar sobre o grave problema do lixo no mar.

Nova xornada de folga das traballadoras da limpeza do Hospital do Salnés. Reclaman equiparación de salarios e condicións ao resto de hospitais do SERGAS. Ao longo deste mes están a convocar paros de dúas horas por cada quenda os martes e mércores, xunto coas compañeiras dos hospitais do Barbanza e de Cee, que tamén se atopan na mesma situación.

A Estación de Viticultura e Enoloxía de Galicia, situada en Ribadumia, está a investigar a viabilidade de viñedos empalizados, máis ergonómicos que as espaldeiras tradicionais. Esta estrutura preséntase como alternativa aos emparrados clásicos do Salnés, que presentan como principal problema a deriva dos fitosanitarios. Na EVEGA levan xa cinco anos con este proxecto. Para acadar as conclusións definitivas precisan aínda recompilar datos da colleita e a súa calidade durante tres anos máis.

Primeira das tres xornadas de concentracións diante dos centros de saúde e PACs de toda Galicia en defensa da atención primaria, pola falta de persoal e a incapacidade de xestión da Xunta. En Vilanova, por exemplo, estiveron presentes representantes da CIG, CSIF, CCOO e UXT. Os catro sindicatos van da man nestas protestas, que repetirán este mércores e xoves. Son mobilizacións previas á folga que convocaron para o vindeiro día 26.

Vilagarcía convértese na vila do "botrato" para conmemorar o Día Internacional contra a violencia de xénero. O concello impulsa polo 25N a primeira campaña construída de forma colectiva a través dun proceso de escoita á veciñanza. As distintas reflexións que lle dan significado ao "botrato" e que lle dan forma á campaña foron aportadas por veciños e veciñas da cidade, incluíndo rapazada e adultos. A programación do 25N complétase en Vilagarcía con distintas actividades.

Xornada informativa do Galp Ría de Pontevedra en Sanxenxo centrada nas axudas que xestiona o organismo no marco do Fondo Europeo Marítimo, de Pesca e de Acuicultura. A elas poden optar proxectos que teñan que ver coa posta en valor da pesca e do medio rural, en particular praceiros e praceiras de Portonovo e Sanxenxo. Por iso, na sesión tamén participou o GDR Salnés-Ulla-Umia para presentar a súa liña de axudas e, deste xeito, cubrir as demandas de todos os sectores produtivos presentes nas prazas.

Borjamina, dos Mozos de Arousa, vaille dar un xiro á súa vida abrindo unha librería en Vilagarcía. O exconcursante vai empregar os cartos do premio da televisión para converter a desaparecía Follas Novas nun novo espazo dedicado aos libros e á cultura. A súa intención é ir un paso máis alá, creando unha zona para organizar actos culturais, como presentacións, exposicións e mesmo unha parte dedicada aos xogos de mesa. O Mozo de Arousa traballa contra o reloxo para poder abrir a finais deste mes.

Preocupación polo avance imparable da toxina en todas as Rías Baixas. Nestes momentos as rías de Pontevedra e Muros-Noia atópanse totalmente clausuradas, así como boa parte da de Arousa. En concreto, están pechados 41 dos 52 polígonos das rías.

Xornada de folga das traballadoras da limpeza do Hospital do Salnés. Xunto coas compañeiras dos complexos hospitalarios do Barbanza e Cee reclaman equiparación de salarios e condicións ao resto de hospitais do SERGAS. Dende esta semana, convocan os martes e mércores paros de dúas horas por cada quenda.