SALNÉS

Sanxenxo reforzará a súa seguridade para facerlle fronte á campaña de verán. Esta mañá o alcalde e o subdelegado do goberno en Pontevedra presidiron a Xunta Local de Seguridade. Avanzaron que a Garda Civil vai reforzar a súa presenza na vila nos meses estivais, ao tempo que reforzará a súa coordinación coa Policía Local. Un dispositivo habitual, indicaron esta mañá, para un dos principais destinos turísticos de Galicia.

Hai avances no proxecto de ampliación do cemiterio parroquial de Rubiáns, en Vilagarcía. Esta mañá o alcalde e o presidente da comunidade de montes desta parroquia asinaban un convenio de colaboración para o impulso do proxecto. O concello vai aportar 60.000 euros. A intención é iniciar os traballos canto antes pola altísima demanda de nichos. A previsión é construír uns 120 panteóns nun terreo anexo ao actual camposanto.

Este sábado temos unha cita en Caleiro. Nesta parroquia de Vilanova celebran un ano máis o San Isidro O Labrego. Un dos principais reclamos da xornada o tradicional desfile de carros e tractores, no que van repartir 1.500 euros en premios. Tampouco vai faltar o reparto de chourizos con pan de millo e distintas propostas musicais, salientando a verbena coa orquestra New York.

A Xunta construirá 25 vivendas de promoción pública en Sanxenxo. O Concello vai ceder ao goberno galego unha parcela de máis de 2.000 metros cadrados nunha zona de Noalla onde se está a levar a cabo un desenvolvemento urbanístico. Hoxe a conselleira de Vivenda confirmou a viabilidade urbanística do terreo. O obxectivo é licitar a construción das vivendas no ano 2026.

rrancan os 'Almorzos saudables' en Sanxenxo. O alumnado de 6º de primaria do colexio Julia Becerra Malvar de Ribadumia foi o primeiro grupo en participar nesta iniciativa impulsada polo Obradoiro de Hostalería do Salnés. O obxectivo é que a rapazada vaia tomando conciencia da importancia de adquirir bos hábitos alimenticios, comezando polo almorzo, que é a comida máis importante do día.

Vilagarcía desvelou hoxe a programación de Santa Rita 2025. As festas prolongaranse do 21 ao 25 de maio convertendo a cidade nun gran escenario do que hoxe denominaron como unha gran romaría popular urbana. A orquestra Panorama estreará no marco destas festas o seu novo espectáculo. Tamén actuarán Os Satélites e Marbella e a banda The Rapants. A isto hai que sumar a Feira Celta, propostas infantís e tamén distintas citas deportivas.

Cambados foi beneficiario de varias axudas da Xunta para a área de Cultura. Ademais dunha achega de 4.000 euros para o fomento da lectura, recibiu outra subvención que permitiu ao goberno local o cambio de ventás na biblioteca de Corvillón. Esta mañá achegouse ao municipio o delegado da Xunta en Pontevedra. Coincidindo coa súa visita o Concelleiro de Cultura pediulle que traslade á Xunta a necesidade de baleirar aos concellos de competencias impropias.

O Día das Letras Galegas Vilagarcía acollerá un gran mercado de segunda man. Chámase 'Vilabela' en el poderemos atopar produtos de todo tipo, dende roupa a vaixelas, pasando por bicicletas ou libros, sumando 85 postos. A proposta nace dun grupo de particulares, co apoio do concello. Vai estar instalado ao longo de toda a xornada na praza da verdura.

O cemiterio de San Martiño de Meis acolle este sábado un acto centrado no uso do galego nos camposantos. Trátase dun estudo elaborado por Ana Belén Vázquez que, desta volta, céntrase no uso do noso idioma nos distintos cementerios deste municipio. O acto terá lugar ás 7 e media da tarde.

A Xunta licitará no mes de xuño a primeira fase da ampliación do colexio Rosalía de Castro do Grove. O proxecto inclúe a creación dun novo volume para acoller o comedor e un ximnasio. A previsión de Educación é que os traballos comecen xa a final deste ano. A reforma completa deste centro suporá un investimento total por parte do goberno galego de 2,6 millóns de euros.