SALNÉS

Normalidade nas comarcas de Pontevedra, O Salnés e Caldas logo do gran apagón deste luns que deixou ás escuras a Península Ibérica. Na maioría de municipios desta zona o subministro eléctrico volvía de madrugada.En zonas da cidade de Pontevedra sobre a 1, na Illa ou Vilagarcía sobre as 4, en Poio case ás 5 ou en Cambados case ás 6. Noutros concellos, como no de Sanxenxo ou O Grove, a luz non regresaba ata as 8 e media desta mañá. Durante a noite, nos municipios reforzouse a presenza policial e dos efectivos de emerxencia para garantir a seguridade da poboación.

Tres persoas detidas no Grove pola vaga de roubos dos últimos días na vila. Un deles foi pillado na allada mentres estaba roubando nunha vivenda na zona do Con. Trátase do mesmo individuo que días antes entrou na Taberna de Beli. A Garda Civil fixo nas últimas horas varios rexistros, que permitiron recuperar moitos dos obxectos roubados. As investigacións continúan abertas e non se descartan novas detencións.

O concello da Illa estuda suprimir do seu novo plan de tráfico do centro urbano o rexistro de matrículas dos clientes do comercio local. Era unha das principais queixas dos negocios, que consideraban engorroso ter que facer un listado coas matrículas dos clientes non residentes e pasarlle despois eses datos á Policía Local. O alcalde avanza que se están a valorar medidas alternativas, como habilitar unha bolsa de estacionamento dentro da zona restrinxida para aqueles que fagan as súas compras no comercio insular.

Alberto Núñez Feijóo traslada o seu apoio ao sector do viño de Rías Baixas. O presidente do PP visitou a adega Paco&Lola en Meaño. Alí, cualificou de 'inmenso erro' a política arancelaria de Trump e defendeu un 'alivio fiscal' para as adegas que se poidan ver afectadas se finalmente o presidente dos Estados Unidos cumpre coas súas ameazas.

Xa se pode visitar en Cambados a mostra Saudarte. Alumando cambadés e vilagarcián participa nesta iniciativa de Fundación Galega contra o Narcotráfico. Unha actividade que busca fomentar a creatividade entre a rapazada a través da arte. Un xeito de promover os hábitos saudables e previr a drogodependencia entre os máis novos.

Preocupación no Grove pola vaga de roubos que están a sufrir na vila. Varios negocios de hostalaría e vivendas sufriron nos últimos días a visita dos ladróns. Mesmo algunha persoa pola rúa sufriu algún ataque. Os comerciantes reclaman máis vixilancia policial, en especial pola noite. O concello acaba de activar o que denominou Plan de Acción Inmediato, coa convocatoria da Xunta Local de Seguridade e a petición de reforzos da Garda Civil.

A Fundación Galega contra o Narcortráfico organiza a semana que vén a súa gala anual. Será o mércores 30 no auditorio de Vilagarcía. O acto inclúe a entrega dos Premios Nécora de Ouro a persoas e entidades que loitan contra as drogas e a actuación do grupo tradicional Cantos da Terra. A entrada é libre e de balde.

Fronte a Illa de Cortegada, no fondo da ría de Arousa, os alcaldes e voceiros do PSOE das comarcas do Salnés e Caldas dixeron 'non a Altri'. Todos eles asinaron hoxe un manifesto en contra da instalación da celulosa en Palas.

Paradela, no concello de Meis, ten todo a punto para as festas de San Gregorio. Os festexos arrancan este xoves. O domingo é o día grande, coa degustación do Bolo de Pascua. Unha elaboración duns once metros cadrados adornada cuns 6.000 ovos enriba. O programa complétase con actos relixiosos, distintas propostas gastronómicas e verbenas.

Xa está en marcha a campaña do Día da Nai en Zona Aberta de Vilagarcía. Os comerciantes e hostaleiros da cidade sortean unha fin de semana para dúas persoas entre a súa clientela.