SALNÉS

O marisqueo cae en picado na ría de Arousa. A Plataforma pola Defensa da Ría de Arousa puxo hoxe cifras sobre a mesa que amosan ás claras o importante descenso da produtividade nos últimos anos. Caen a maioría dos moluscos bivalvos, destacando a ameixa fina e o berberecho. Unha baixada que se traduce nun grave impacto económico. Dende o ano 2021, as perdas do marisqueo na ría de Arousa roldan os 47 millóns de euros. Por iso o sector reclama á Xunta que actúe con urxencia.

Como xa é habitual, Sanxenxo conta cun espazo privilexiado dentro da Feira Internacional de Turismo. O municipio ten instalado un mostrador no corazón do stand de Galicia, por onde pasou hoxe o presidente da Xunta e outras autoridades. Nese espazo, o concello ofrece todo tipo de información para que o visitante poida gozar dunha experiencia completa os 365 días do ano.

Detido un arousán no marco da última operación antidroga que se está a desenvolver na comarca do Salnés. Con el, o número de arrestados ascende a oito. O resto son cidadáns albaneses que están sendo postos xa a disposición xudicial. Esta operación desenvolvida conxuntamente pola Policía Nacional e a Garda Civil permitiu desartellar unha organización criminal e a incautación de 1.100 quilos de cocaína mentres era alixada nas costas de Vilanova.

Novo golpe ao narcotráfico na comarca do Salnés. Sete detidos e ao redor dun quilo de cocaína incautado é o balance inicial que deixa o operativo desenvolvido esta madrugada na zona de Vilanova de Arousa pola Garda Civil e a Policía Nacional. Tamén foi localizada unha lancha nunha praia da zona de Rego do Alcalde. A operación está baixo secreto de sumario.

Vilagarcía diralle adeus en breve á Rúa Conde Vallellano, Xeneral Yagüe e Almirante Fontán. O Concello quere cumprir dunha vez por todas a Lei de Memoria Democrática e eliminar do rueiro municipal os vestixios da ditadura franquista. Esta mañá, celebrouse un encontro entre os voceiros das distintas formacións políticas para avanzar no cambio de nomes buscando o maior consenso posible e dándolle máis protagonismo ás mulleres. Dende Iniciativa pola Memoria din que aínda quedan outras mostras de apoloxía do franquismo na cidade que hai que eliminar e cren que o cambio de nome destas rúas chega tarde.

Os donos da vivenda foron abordados contra as 5:00 horas desta mañá, cando saían para ir traballar, por tres encarapuchados que portaban unha pistola. Os individuos agrediron aos donos de forma moi violenta e mesmo rociaron gasolina á dona da casa.

Familias de rapaces con autismo denuncian a súa preocupación polo futuro incerto que se lles aveciña ao rematar a súa etapa escolar. Son ata dez rapaces da contorna do Salnés e Pontevedra que nestes momentos non teñen garantida praza nun centro de día para adultos en Vilagarcía, porque o de BATA está xa ao límite da súa capacidade. A Xunta polo de agora ofrécelles como solución que os mozos, todos eles de entre 18 e 21 anos, acudan a diario a un centro de Nigrán. Unha proposta que as familias rexeitan.

Na zona de Cabanelas, no concello de Ribadumia, localízase un dos puntos negros da nosa rede viaria. Trátase dunha pronunciada curva onde as saídas de vía son constantes. Moitos dos vehículos sinistrados acaban esnafrándose contra o muro dunha casa próximo. Os seus donos xa están afeitos a levar sustos, pero piden que se tomen medidas para evitar os sinistros e evitar posibles vítimas. O último accidente tivo lugar hai tan só uns días.

A Illa de Arousa quere seguir ampliando a súa rede de paneis fotovoltaicos. O concello opta a poñer en marcha un proxecto que suporía a instalación de case 170 novos paneis, a repartir entre os  tellados da casa consistorial e do museo da conserva. Son os derradeiros edificios municipais non que aínda non se instalou esta fonte de enerxía renovable. O plan iría máis alá porque pretenden que o excedente da produción poida destinarse a familias en risco de exclusión social.

A confraría de Vilanova estuda tomar 'medidas drásticas' para facerlle fronte á crise que atravesa o sector marisqueiro. O pósito estuda aplicar de novo un ERTE, logo de pechar un ano 2024 especialmente malo. Aseguran que facturaron tan só o 25% do 2023, que xa fora un ano malo. Á vista destes resultados, din afrontar con moito pesimismo este 2025.