SALNÉS

Este xoves celebrouse a Xunta Local de Seguridade, na que o subdelegado do goberno comprometeuse a incrementar a presenza da benemérita en datas clave no municipio en eventos masivos. No encontro tamén se destacou que Sanxenxo é un concello 'extremadamente seguro', cunha diminución no número de delitos de máis dun 4% no último ano.

Cita co pasado esta fin de semana en Vilanova. Será na novena edición da Mostra de Oficios e Tradicións que organiza a Asociación O Castro, de Baión. A programación inclúe representacións de actividades como a malla, ir ao toxo ou traballos no lavadoiro. Todo nun ambiente festivo, con distintas propostas musicais e procurando a implicación da rapazada e mocidade para que nunca nos esquezamos de onde vimos.

O pazo de Vista Real acollerá o vindeiro 4 de xullo O Son de Vilanova Fest. Trátase da terceira edición deste evento que non deixa de medrar. Este ano Rafa Sánchez, de La Unión, é o cabeza de cartel. Completan a programación La década prodigiosa, Amistades Peligrosas, Pancho Vanora e Manu GZ DJ. A organización agarda superar as 3.000 persoas que se xuntaron o ano pasado.

A Illa de Arousa prepárase para unha mobilización multutidunaria contra Altri e a mina de Touro - O Pino por terra e mar. A organización agarda a participación duns 500 barcos de toda a ría na manifestación convocada para este vindeiro domingo para esixir a denegación definitiva destas dous proxectos. Por terra, a marcha partirá do Bao e ramatará no Xufre. Fan un chamamento á participación masiva porque, lembran, a mobilización social foi clave para frear ata o de agora estas dúas ameazas.

A iniciativa solidaria que impulsa o CPI do Mosteiro vaise celebrar este venres. Este ano a recadación irá destinada para o proxecto Son das flores, iniciativa dun colexio vigués que permite ofrecer clases de música para rapazada de familias con poucos recursos. Outra parte irá destinada ao banco de alimentos de Meis. Na xornada participará o alumnado de todos os centros educativos do municipio, xuntando uns 400 nenos e nenas. Ademais de obradoiros e xogos haberá distintas actuacións musicais para todos os públicos.

Este vindeiro domingo A Illa de Arousa será o escenario da gran manifestación contra Altri e a mina de Touro-O Pino. A voceira nacional do BNG fixo un chamemento este luns á participación masiva nesta mobilización na defensa do río Ulla e da ría de Arousa. Dende o municipio insular, Ana Pontón reclamou a denegación definitiva da macrocelulosa en Palas e paralizar o proxecto da megamina que, denunciou, o PP quere resucitar a pesar da súa grave afectación.

Ribadumia xa goza da Festa do Tinto do Salnés. Este venres tivo lugar a inauguración oficial da LIII edición , na que 14 adegas ofrecen os seus mellores viños. Pola carpa instalada no centro de Barrantes xa pasaron centos e centos de persoas. Agárdase unha edición multitudinaria grazas ao bo tempo e as temperaturas agradables que se prevén para esta fin de semana. Este sábado celebrarase o día grande, co xantar de confraternidade, a investidura dos valedores do viño e a gran cata final do concurso.

Xornada de mobilizacións en defensa da sanidade, alertando do incremento das listas de agarda. Na nosa contorna houbo protestas ás portas do Hospital Provincial, en Pontevedra, e no Hospital do Salnés. Advirten das demoras na atención primara e nas consultas especializadas e as consecuencias que isto está a ter no servizos de urxencias. Reclámanlle á Xunta un incremento do investimento na atención primaria ata acadar o 25% do orzamento do Sergas.

Os partidos da cetegoría infantil disputaranse os días 12, 13 e 14 deste mes, mentres que os benxamíns competirán os días 19, 20 e 21. O torneo traerá ata Ribadumia combinados de todas partes de España, pero tamén terá unha destacada presenza internacional. Este ano estréase México, coa participación da selección da Copa de Aguascalientes. En conxunto, agárdase que a copa reúna no municipio máis de 5.000 persoas.

Zona Aberta de Vilagarcía lanza a segunda edición da súa ruta de tapas e compras. A iniciativa, que busca promocionar a hostalería e comercio local, arranca este xoves. Na cita participan de novo 11 establecementos, que ofrecerán as súas tapas a un prezo único de 4 euros. Ademais, este ano Martín Códax súmase á proposta, coa opción de gozar do petisco e unha copa de viño por 6 euros. O colectivo pon en xogo ademais 300 euros en vales de compra.