Ribadumia

Música e gastronomía irán da man este vindeiro domingo en Ribadumia. A carballeira da localidade acollerá a sexta edición da Romaría da Música, que organiza a banda municipal co apoio do concello. Catro agrupacións daranse cita nun encontro no que non faltarán os callos, o polbo ou a empanada. Só resta que o tempo acompañe.

Ribadumia prepárase para a LIII Festa do Tinto do Salnés. A cita será do catro ao sete de xuño co viño e a gastronomía como principais ingredientes, pero cunha gran programación paralela, con multitude de propostas musicais. A destacar, a visita dos Festicultores, un concerto de Antonio Barros coa Agrupación Musical de Ribadumia ou algunhas das principais orquestras do país. O vindeiros días 8 e 9 de maio recolleranse os viños que se presentarán a concurso. O ano pasado rexistráronse máis dun cento de aspirantes.

Uns 250 deportistas daranse cita este domingo en Ribadumia na sexta edición da XCO Kiwi Atlántico. Trátase dunha proba de mountain bike cun percorrido técnico que organiza o Club Ciclista Ribadumia pola contorna desta empresa. De feito, as súas instalacións forman parte do percorrido. Este ano a proba é puntuable para o campionato galego.

A Mancomunidade do Salnés quere darlle un impulso ao turismo de autocaravanas. O organismo comarcal acaba de presentar un plan para crear áreas nos concellos do interior. A idea é desconxestionar os municipios costeiros fomentando este tipo de turismo en concellos como Meis, Ribadumia ou Meaño. Segundo os cálculos da Mancomunidade precisaríanse unhas 300 prazas para dar resposta a toda a demanda.

Somos Cambados e Somos Ribadumia participarán este sábado nun encontro de candidaturas municipalistas de toda Galicia. Unha reunión que se vai celebrar en Chantada e que busca avanzar na construción dunha confederación de proxectos locais de cara ás municipais de 2027. A proposta pretende crear unha coalición específica para eses comicios mantendo a autonomía de cada formación, pero intentando ser clave para a configuración das Deputacións.

A veciñanza de Ribadumia ten unha cita o vindeiro 10 de maio na Festa da Familia. A xornada inclúe distintos tipos de actividades de lecer, educativas e culturais. O obxectivo é promover a convivencia familiar e veciñal e fomentar os valores da inclusión e a saúde. Nesta proposta inclúense, por exemplo, distintos xogos, postos informativos de distintas asociacións e mesmo un contacontos para a rapazada.

Kiwi Atlántico prepara o lanzamento de petiscos de froita deshidratada con pezas non comerciais. A empresa, asentada en Ribadumia, leva máis de tres anos traballando nun proxecto centrado na liofilización que permite manter todas as propiedades do produto potenciando o seu sabor. O que buscan dende a compañía é reducir o desperdicio alimentario, tentando xerar na cidadanía novos hábitos de consumo saudables.

O mellor torneo internacional alevín do mundo fai de novo parada esta Semana Santa en Ribadumia. A fase previa do Arousa Fútbol 7 arranca este Xoves Santo no campo da Senra coa participación de 65 equipos dispostos a loitar por un pase para o torneo do mes de maio. Por diante temos catro intensos días de futbol, con máis de 10 horas diarias de competición e a participación de máis de 1.000 xogadores.

Ribadumia celebra a súa primeira Mesa fronte a Violencia de Xénero. Trátase dunha ferramenta de coordinación entre os distintos actores implicados na loita contra esta lacra. Na xuntanza participaron representantes da administración a distintos niveis, Garda Civil e membros da comunidade educativa do municipio e do eido da saúde. Neste tipo de mesas faise unha radiografía de cal é a realidade do concello no referente á violencia de xénero, que necesidades presenta e que medidas cómpre tomar para o fomento da igualdade.

Ata o vindeiro seis de abril está aberta a nova convocatoria de axudas Leader que xestiona o GDR Salnés-Ulla-Umia. Poden optar a estes fondos proxectos que favorezan o desenvolvemento de zonas rurais, que fomenten o asentamento de poboación ou xeren postos de traballo. Destes fondos pódense beneficiar empresas e autónomos, pero tamén asociacións, comunidades de montes e os propios concellos. A gran novidade desta edición é que a convocatoria pasou de dúas a tres anualidades.