ZZ DESTACADA PORTADA

Tenso pleno o vivido este xoves en Ribeira. A oposición esixiulle ó goberno explicacións sobre o cambio de criterio para emprazar a futura residencia nunha parcela entre Cruxeiras e San Roque, desbotando definitivamente o proxecto das Saíñas. Dende o executivo aclararon que a busca do novo emprazamento realizouse trala modificación da normativa para a construción de edificios públicos en zonas potencialmente inundables.

Uns 1400 mariscadores da ría de Noia volverán ó traballo o próximo 13 de outubro. A campaña arranca con moitas ganas tras meses sen actividade por mor das riadas que acabaron co 80 por cento de recurso. Sen embargo, as expectativas son moderadas.

A piscina municipal de Noia volve estar operativa despois de varios meses de obras. O Concello reabriu onte mércores  a instalación tras realizar nela diferentes actuacións de renovación e mantemento.

O Partido Socialista levará o problema da vivenda ao vindeiro pleno municipal de Pontevedra. A formación presentará unha moción con dúas propostas principais: dunha banda, a creación dunha bolsa municipal de vivendas en alugueiro; da outra, aplicación de incentivos fiscais para introducir pisos baleiros no mercado. Medidas de choque, dixo Iván Puentes, para atacar un problema que preocupa, e moito, a cidadanía.

Congalsa, empresa especializada na elaboración de todo tipo de produtos conxelados a base de peixe e marisco e pratos precociñados, está un ano máis presente en Conxemar, a feira internacional do sector que se celebra estes días no recinto feiral de Ifevi, en Vigo. A firma, con sede na Pobra, acudiu á Conxemar cun espazo propio, duns cen metros cadrados de superficie, para ofrecer as últimas novidades nas súas diferentes marcas propias orientadas ó canal HORECA, a través da súa campaña ‘O mellor está por vir’.

O Carril xa presume de escudo. Trátase dunha réplica en pedra da insiginia do antigo concello, que foi instalada na praza da Liberdade, unha vez foi retirado da zona o vello transformador eléctrico. O concello de Vilagarcía investiu neste escudo de 16 metros cadrados uns 17.000 euros. Hai uns meses xa se instalou un semellante en Vilaxoán.

O BNG de Outes demanda ó goberno que poña en marcha a vivenda municipal da antiga escola do Bosque. O anterior executivo deixou acondicionada e con mobiliario a instalación para o seu alugueiro pero cincocentos días despois segue baleira.

O concello de Noia avanza na mellora dos espazos públicos do municipio cun plan de rehabilitación de parques infantís. As actuacións, coa reforma integral do parque da alameda como proxecto principal, superan os cen mil euros.

A adega ATTIS conmemora o seu 25 aniversario. Este martes, organizou en Meaño un acto conmemorativo para repasar este primeiro cuarto de século de traxectoria. Neste tempo, esta adega familiar foi expandindo o seu proxecto, elaborando viños brancos e tintos cun total de 20 marcas. Ademais, está presente a día de hoxe en 25 países.

A Deputación presentou a segunda edición do programa MercaNaVila de apoio ó comercio local. O organismo provincial mobilizará nesta campaña uns cinco millóns de euros, con vales de desconto ata 100 euros para poder mercar nos establecementos da provincia con menos de vinte mil habitantes.